مریم نواز کی بڑھتی مقبولیت مخالفین کی تکلیف کی اصل وجہ ہے: مریم اورنگزیب

لاہور:سینئر صوبائی وزیر مریم اورنگزیب نے وزیراعلیٰ پنجاب مریم نواز شریف کے دورۂ لندن اور اس کے اخراجات پر ہونے والے پروپیگنڈے کو کڑے ہاتھ لیتے ہوئے واضح کیا ہے کہ اصل مسئلہ جہاز کا نہیں بلکہ مریم نواز کی دن بہ دن بڑھتی ہوئی کارکردگی اور مقبولیت ہے جو مخالفین سے ہضم نہیں ہو رہی۔
لاہور میں پریس کانفرنس اور جاری کردہ بیانات میں مریم اورنگزیب نے دوٹوک الفاظ میں دہرایا کہ یہ بات پہلے ہی واضح کی جا چکی ہے کہ مریم نواز اپنے دورۂ لندن کے تمام اخراجات خود ادا کریں گی۔ انہوں نے کہا کہ وزیراعلیٰ پنجاب کے اس بیان کو صوبوں میں نفرت اور قوم کے اندر تقسیم پیدا کرنے کے لیے استعمال کرنے والے عناصر کو اب عوام سے معافی مانگنی چاہیے۔
خیبرپختونخوا حکومت کے ترجمان کی جانب سے کی جانے والی نازیبا گفتگو پر شدید برہمی کا اظہار کرتے ہوئے صوبائی وزیر نے اسے پی ٹی آئی کی خواتین کے خلاف بدزبانی کی پرانی روایت کا تسلسل قرار دیا۔ انہوں نے کڑے الفاظ میں کہا کہ بدقسمتی سے آج خیبرپختونخوا پر ایسے عناصر مسلط ہو چکے ہیں جو پختونوں کی شاندار روایات سے بھی یکسر ناآشنا ہیں۔ ماؤں، بہنوں اور بیٹیوں کی عزت و احترام کرنا غیور پختون روایات کا بنیادی حصہ رہا ہے، لیکن سیاسی مفادات کے لیے اس کی دھجیاں اڑائی جا رہی ہیں۔
مریم اورنگزیب نے مزید کہا کہ دہشت گرد تو بندوق اور خودکش جیکٹ کو ہتھیار بناتے ہیں، لیکن ان کے سیاسی سہولت کار زبان کو انسانوں اور خواتین کی توہین کے لیے بطور ہتھیار استعمال کرتے ہیں۔ انہوں نے خبردار کیا کہ سیاست میں خواتین کی عزت نفس کو مجروح کرنے کے لیے زبان کا غلط استعمال ایک انتہائی قابلِ نفرت اور گھٹیا رویہ ہے، جسے مزید برداشت نہیں کیا جائے گا۔