لاہور:سابق وزیرِ اعلیٰ پنجاب اور سینیئر سیاستدان میاں منظور احمد وٹو لاہور میں انتقال کر گئے۔
مرحوم کی نماز جنازہ کل (17دسمبر) بروز بدھ حویلی وساوے والا اوکاڑہ میں دن 2 بجے ادا کی جائے گی۔
میاں منظور احمد وٹو کی وفات پر مختلف سیاسی جماعتوں کے رہنماؤں اور کارکنوں نے گہرے دکھ اور افسوس کا اظہار کیا ہے اور صوبے و ملک کے لیے ان کی خدمات کو خراجِ تحسین پیش کیا ہے۔
میاں منظور احمد وٹو قومی سیاست میں ایک طویل عرصے تک متحرک رہے اور انہوں نے بطور وزیرِ اعلیٰ پنجاب اور اسپیکر پنجاب اسمبلی سمیت متعدد اہم سیاسی عہدوں پر خدمات انجام دیں۔ انہیں ایک تجربہ کار سیاستدان اور مضبوط سیاسی کردار کے طور پر جانا جاتا تھا۔
میاں منظور احمد وٹو کی وفات کو پنجاب کی سیاست کے ایک اہم باب کا اختتام قرار دیا جا رہا ہے۔ عوامی خدمت اور سیاسی وابستگی کے حوالے سے ان کا طویل سفر ہمیشہ یاد رکھا جائے گا۔
سابق وزیراعظم پاکستان راجا پرویز اشرف، خرم جہانگیر وٹو اور دیگر نے میاں منظور احمد وٹو کے انتقال پر دکھ اور افسوس کا اظہار کرتے ہوئے ان کے درجات بلندی کی دعا کی ہے۔
صدر آصف زرداری کا اظہار افسوس
صدرِ مملکت آصف علی زرداری نے سینئر سیاستدان میاں منظور احمد وٹو کے انتقال پر گہرے دکھ اور افسوس کا اظہار کیا ہے۔ منگل کو ایوانِ صدر کے پریس ونگ سے جاری بیان کے مطابق صدر مملکت نے کہا کہ میاں منظور احمد وٹو نے بطور سپیکر پنجاب اسمبلی، وزیراعلیٰ پنجاب، وفاقی وزیر اور مختلف اہم سیاسی ذمہ داریوں میں عوامی خدمت اور قومی ترقی کے لئے گرانقدر خدمات انجام دیں۔
انہوں نے کہا کہ مرحوم نے بطور سینئر سیاستدان جمہوری اداروں کے استحکام اور علاقائی مسائل کے حل میں اہم کردار ادا کیا، مرحوم کی دانائی، قیادت اور قومی یکجہتی کے لئے خدمات ہمیشہ یاد رکھی جائیں گی۔ صدرِ مملکت نے دعا کی کہ اللہ تعالیٰ مرحوم کو جوارِ رحمت میں جگہ عطا فرمائے اور لواحقین کو صبرِ جمیل عطا کرے۔