اسلام آباد:سی ای او کلب پاکستان نے سالانہ ایوارڈز 2024-25 کا اعلان کر دیا ہے، نیشنل ووکیشنل اینڈ ٹیکنیکل ٹریننگ کمیشن ( نیوٹیک )کی چیئرپرسن گُلمینہ بلال احمد کو پاکستان کی بہترین چیف ایگزیکٹو آفیسر کا ایوارڈ دیا گیا۔سی ای او کلب پاکستان ملک کا ایک نمایاں بزنس نیٹ ورکنگ اور لیڈرشپ ڈویلپمنٹ پلیٹ فارم ہے، جو ملکی و غیر ملکی چیف ایگزیکٹوز، کاروباری رہنماؤں اور سینئر پروفیشنلز کو ایک جگہ اکٹھا کرتا ہے۔ ادارہ ہر سال سی ای او سمٹس، شعبہ جاتی کانفرنسز، ایوارڈز اور اپنی معروف اشاعت “پاکستان کے 100 بہترین سی ای اوز اور کمپنیاں” سمیت متعدد سرگرمیوں کا انعقاد کرتا ہے۔
ایوارڈز میں دیگر نمایاں شخصیات میں محمد عاطف حنیف (سی ای او ال برکتہ بینک)، ڈاکٹر روبینہ خلجی (ایف ایف اسٹیل) اور حسن رضا (سی ای او خیبر بینک) بھی شامل ہیں، جنہیں مختلف کیٹیگریز میں اعزازات سے نوازا گیا۔تقریب کے مہمانِ خصوصی گورنر خیبرپختونخوا فیصل کریم کنڈی نے اپنے خطاب میں کہا کہ پاکستان کاروبار اور سرمایہ کاری کے لیے سازگار ماحول کا حامل ہے اور ملک کے پاس شاندار ٹیلنٹ کی کمی نہیں۔ انہوں نے کہا کہ حکومت کی مؤثر پالیسیوں کے باعث معیشت مسلسل بہتری کی طرف گامزن ہے۔ گورنر نے ایوارڈ جیتنے والوں کو مبارک باد دیتے ہوئے زور دیا کہ ہم سب نے مل کر پاکستان کو ترقی یافتہ ممالک کی صف میں کھڑا کرنا ہے۔
تقریب میں سی ای او کلب پاکستان کے بانی و صدر اعجاز نثار، امریکی قونصل جنرل پشاور تھامس ایکرٹ، مشیر خزانہ خیبرپختونخوا مزمل اسلم، انڈسٹریلسٹ ایسوسی ایشن کے صدر ایوب زکوڑی، سفیر حامد اصغر خان، صدر سی ای او اسلام آباد زاہد لطیف خان، سرحد چیمبر آف کامرس اینڈ انڈسٹری پشاور کے صدر جنید الطاف، راولپنڈی چیمبر آف کامرس اینڈ انڈسٹری کے صدر عثمان شوکت، صنعتکار عضنفر بلور سمیت ملک بھر سے تعلق رکھنے والے سی ای اوز، بزنس لیڈرز اور ویمن چیمبرز کی عہدیداران نے شرکت کی۔تقریب کو ملک میں بزنس لیڈرشپ کی حوصلہ افزائی اور پاکستان کے مثبت اقتصادی تشخص کو اجاگر کرنے کی ایک اہم پیش رفت قرار دیا جا رہا ہے۔