اسلام آباد جوڈیشل کمپلیکس خودکش حملے کا سہولت کار پنڈی سے اور ہینڈلر خیبرپختونخوا سے گرفتار،

اسلام آباد:اسلام آباد جوڈیشل کمپلیکس خودکش حملے کا سہولت کار پنڈی سے اور ہینڈلر خیبرپختونخوا سے گرفتار کرلیا گیا۔
رپورٹ کے مطابق سیکیورٹی اداروں نے انٹیلی جنس کے مربوط آپریشن کے بعد اسلام آباد جوڈیشل کمپلیکس خودکش حملے کا سہولت کار راولپنڈی سے  جبکہ اس کا ہینڈلر خیبر پختونخوا سے گرفتارکرلیا ہے۔
سول انٹیلیجنس ایجنسی کی کارروائی کے بعد دونوں ملزمان کو حراست میں لے کر نامعلوم مقام پر منتقل کیا گیا۔
ذرائع کے مطابق سہولت کار گزشتہ ایک ماہ سے راولپنڈی میں مقیم تھا جبکہ ہینڈلر خیبرپختونخوا سے گرفتار ہوا۔ حملے سے قبل دونوں ملزمان نے متعدد بار ریکی کر کے منصوبہ بندی مکمل کی تھی۔ سہولت کار کو ڈھوک پراچہ کے علاقے سے گرفتار کیا گیا، جہاں وہ راولپنڈی کینٹ کے اہم مقامات کی ریکی کرتا رہا۔
وزیر مملکت برائے داخلہ طلال چوہدری نے بتایا کہ خودکش بمبار افغانستان سے تعلق رکھتا تھا اور ابتدائی تحقیقات سے یہ بھی معلوم ہوا کہ وہ پاکستانی زبان یا کرنسی سے واقف نہیں تھا۔ بمبار اسلام آباد میں مختلف موٹر سائیکلوں پر سفر کرتا رہا اور کرایہ دینے میں دشواری کا سامنا کر رہا تھا۔
یاد رہے کہ اسلام آباد کچہری پر ہونے والے حملے میں کم از کم 12 افراد جاں بحق اور 36 زخمی ہوئے تھے۔