لاہور:(حافظ نعیم سے ) ترجمان محکمہ داخلہ پنجاب کے مطابق وزیراعلیٰ پنجاب کی ہدایت پر محکمہ داخلہ اور سول ڈیفنس پنجاب نے سیلاب متاثرین کی امداد کیلئے اپنی طرز کا پہلا ایئر لفٹ ڈرون ریلیف آپریشن شروع کر دیا ہے۔
جدید ٹیکنالوجی کی مدد سے ایئر لفٹ ڈرونز کے ذریعے سیلاب میں پھنسے افراد کو خوراک، ادویات اور دیگر امدادی سامان فراہم کیا جا رہا ہے۔ ایئر لفٹ ڈرون سے 200 کلوگرام تک خوراک، ادویات اور امداد ناقابلِ رسائی علاقوں میں پہنچائی جا رہی ہے۔
جن مقامات تک کشتیوں کے ذریعے رسائی ممکن نہیں، وہاں ڈرون سروس متاثرین کیلئے امید کی کرن بن چکی ہے۔ سول ڈیفنس کے تربیت یافتہ اہلکار نہ صرف امدادی سامان پہنچا رہے ہیں۔ ڈرون سروس سے ناقابل رسائی اور خطرناک مقامات سے انسانوں کو محفوظ انداز میں ایئرلفٹ کیا جاسکتا ہے۔
سیکرٹری داخلہ پنجاب اور ڈائریکٹر سول ڈیفنس ذاتی طور پر متاثرہ علاقوں میں جا کر ڈرون ریلیف آپریشن کی نگرانی کر رہے ہیں۔ وزیراعلیٰ پنجاب کی خصوصی ہدایت پر 10 مزید ایئر لفٹ ڈرونز کی خریداری کا فیصلہ کیا گیا ہے تاکہ امدادی سرگرمیوں کو مزید مؤثر بنایا جا سکے۔
پنجاب کے تمام متعلقہ محکمے اور افسران 24 گھنٹے سیلاب متاثرین کی خدمت میں مصروف ہیں۔ متاثرین نے بروقت امداد اور جدید ٹیکنالوجی کے استعمال پر حکومت پنجاب کے اس اقدام کو قابلِ تحسین قرار دیا ہے۔