امریکی صدر ڈونلڈ ٹرمپ کے بااثر مشیر اور وائٹ ہاؤس کے ڈپٹی چیف آف اسٹاف اسٹیفن ملر نے الزام عائد کیا ہے کہ بھارت روس سے تیل خرید کر یوکرین کے خلاف جاری جنگ میں مالی مدد فراہم کر رہا ہے۔
غیر ملکی خبر رساں ادارے کے مطابق، فاکس نیوز کے پروگرام "سنڈے مارننگ فیوچرز” میں گفتگو کرتے ہوئے اسٹیفن ملر نے کہا کہ صدر ٹرمپ کا مؤقف واضح ہے کہ کسی بھی ملک کے لیے یہ ناقابل قبول ہے کہ وہ روسی تیل خرید کر اس جنگ کو طول دے۔ انہوں نے کہا کہ روسی تیل کی خریداری میں بھارت کا حجم چین کے برابر ہے، جو ایک چونکا دینے والا انکشاف ہے۔
بین الاقوامی ماہرین کے مطابق، یہ بیان بھارت جیسے اہم اتحادی پر ٹرمپ انتظامیہ کی جانب سے اب تک کی سب سے سخت تنقید سمجھا جا رہا ہے۔
رائٹرز کے مطابق، واشنگٹن میں بھارتی سفارت خانے نے اس بیان پر کوئی ردعمل نہیں دیا، تاہم بھارتی حکومتی ذرائع کا کہنا ہے کہ نئی دہلی امریکی دباؤ کے باوجود روس سے تیل کی خریداری جاری رکھے گا۔