پیرس (بے نقاب نیوز)
فرانس کی حکومت نے بڑھتے ہوئے بجٹ خسارے اور عوامی قرضوں پر قابو پانے کے لیے سال 2027 کے مجوزہ بجٹ میں کفایت شعاری کے سخت اقدامات کا اعلان کیا ہے، جس کے تحت 23 ہزار سرکاری ملازمتیں ختم کرنے کی تجویز بھی پیش کی گئی ہے۔
غیر ملکی میڈیا رپورٹس کے مطابق فرانسیسی حکومت کا ہدف ہے کہ عوامی اخراجات میں کٹوتی کر کے بجٹ خسارے کو جی ڈی پی کے 5.4 فیصد سے کم کر کے 5 فیصد تک لایا جائے۔ اس مالیاتی پیکیج میں سرکاری ملازمتوں میں کمی کے علاوہ پنشن، صحت اور سماجی تحفظ کے شعبوں میں بھی اخراجات محدود کرنے اور سرکاری ملازمین کی تنخواہوں میں عمومی اضافہ روکنے کی تجاویز شامل ہیں۔
حکومت کے ان مجوزہ اقدامات کے خلاف فرانس بھر میں سرکاری ملازمین کی تنظیموں، ٹریڈ یونینز، پنشنرز اور طلبہ کی جانب سے شدید احتجاج اور مظاہرے کیے جا رہے ہیں۔ دوسری جانب منقسم فرانسیسی پارلیمان میں بھی 2027 کے بجٹ بل پر کڑی بحث اور اپوزیشن کی جانب سے سخت مخالفت جاری ہے۔

