راولپنڈی (ویب ڈیسک) پاکستان کرکٹ ٹیم نے شاندار کارکردگی کا مظاہرہ کرتے ہوئے راولپنڈی کرکٹ اسٹیڈیم میں کھیلے گئے دوسرے ٹیسٹ میچ میں سری لنکا کو 8 وکٹوں سے شکست دے کر دو میچز کی سیریز 0-1 سے اپنے نام کر لی ہے۔ قومی ٹیم نے دو سال اور چھ سیریز کے طویل انتظار کے بعد ٹیسٹ سیریز میں کامیابی حاصل کی ہے۔
میچ کے چوتھے روز مہمان ٹیم سری لنکا نے 9 وکٹوں کے نقصان پر 309 رنز سے اپنی دوسری نامکمل اننگز کا آغاز کیا اور پوری ٹیم 316 رنز بنا کر آؤٹ ہو گئی، جس کے نتیجے میں پاکستان کو جیت کے لیے 90 رنز کا آسان ہدف ملا۔
پاکستان نے 90 رنز کا ہدف محض دو وکٹوں کے نقصان پر حاصل کر لیا۔ قومی ٹیم کی جانب سے عامر جمال 34 اور اذان اویس 32 رنز بنا کر ناقابلِ شکست رہے، جبکہ طیب عارف 13 اور محمد طحہٰ 4 رنز بنا کر پویلین لوٹے۔
اس سے قبل کپتان بابر اعظم نے ٹاس جیت کر سری لنکا کو پہلے بیٹنگ کی دعوت دی تھی۔ پاکستانی فاسٹ باؤلرز کی تباہ کن باؤلنگ کے سامنے مہمان ٹیم پہلی اننگز میں صرف 98 رنز پر ڈھیر ہو گئی تھی، جس میں محمد عباس، عامر جمال اور رضا اللہ نے تین، تین وکٹیں حاصل کی تھیں۔ جواب میں پاکستان نے پہلی اننگز میں غازی غوری کے 54، اذان اویس کے 47، طیب عارف کے 46 اور رضا اللہ کے 42 رنز کی بدولت 325 رنز بنا کر 227 رنز کی فیصلہ کن برتری حاصل کی تھی۔
دوسری اننگز میں بھی محمد عباس اور عامر جمال نے 3، 3 جبکہ رضا اللہ نے 2 اور سلمان علی آغا اور ثاقب خان نے ایک، ایک کھلاڑی کو آؤٹ کیا۔ میچ میں مجموعی طور پر 6 وکٹیں حاصل کرنے پر فاسٹ باؤلر محمد عباس کو پلیئر آف دی میچ قرار دیا گیا۔ واضح رہے کہ دونوں ٹیموں کے درمیان سیریز کا پہلا ٹیسٹ میچ ڈرا ہو گیا تھا۔

