نیویارک: دنیا کے عظیم ترین مصوروں میں شمار ہونے والے ڈچ مصور ونسنٹ وین گوگ کا ایک شہرہ آفاق شاہکار نیلامی میں تمام سابقہ ریکارڈ توڑتے ہوئے 19 کروڑ 4 لاکھ امریکی ڈالر (14 کروڑ 49 لاکھ برطانوی پاؤنڈ، 28 کروڑ 50 لاکھ آسٹریلوی ڈالر یا تقریباً 53 ارب پاکستانی روپے) میں فروخت ہو گیا ہے۔
معروف نیلام گھر ’سوتھبیز‘کے مطابق 1890 میں فرانس کے علاقے اوورز-سر-اوئز میں تخلیق کی گئی اس پینٹنگ ’شٹینیئرز این فلورز‘ (کھلتے ہوئے شاہ بلوط کے درخت) نے وین گوگ کے کسی بھی فن پارے کی نیلامی کا اب تک کا سب سے بڑا ریکارڈ قائم کر دیا ہے اور یہ رواں سیزن میں نیلام ہونے والا مہنگا ترین فن پارہ بن گیا ہے۔
’نیویارک ٹائمز‘ کی رپورٹ کے مطابق اس تاریخی پینٹنگ کو معروف آرٹ ڈیلر اور ایکواویلا گیلریز کے سربراہ ولیم ایکواویلا نے خریدا ہے۔ اس سے قبل وین گوگ کی کسی پینٹنگ کی نیلامی کا ریکارڈ نومبر 2022 میں قائم ہوا تھا جب ان کا 1888 کا شاہکار 11 کروڑ 72 لاکھ ڈالر میں فروخت ہوا تھا، تاہم ایک سال سے بھی کم عرصہ قبل کرسٹیز کے ذریعے ایک نجی سودے میں ان کی ایک اور پینٹنگ تقریباً 19 کروڑ ڈالر میں فروخت کی گئی تھی۔
نیلامی سے قبل اس پینٹنگ کی ملکیت کے حوالے سے ایک حساس تاریخی تنازع بھی سامنے آیا تھا۔ ایک بااثر جرمن پبلشر سیموئل فشر نے 1909 میں پیرس سے یہ پینٹنگ خریدی تھی، جسے ان کے خاندان نے 1936 میں نازی دورِ حکومت کے دوران فروخت کر دیا تھا۔ فشر کے ورثاء نے اس نیلامی کی مخالفت کرتے ہوئے مؤقف اپنایا تھا کہ ان کے خاندان نے نازی مظالم اور شدید مالی نقصانات کے باعث مجبوری میں یہ فن پارہ فروخت کیا تھا۔
ورثاء کے برلن میں مقیم وکیل گنار شنابیل نے سوتھبیز سے مطالبہ کیا تھا کہ وہ ثابت کرے کہ 1936 میں یہ پینٹنگ مارکیٹ ویلیو پر فروخت ہوئی تھی۔ دوسری جانب بلیقیئر-آریئٹا خاندان 1975 سے نصف صدی سے زائد عرصے تک اس پینٹنگ کا مالک رہا۔ تاہم نیلامی سے ایک روز قبل منگل کو سوتھبیز نے اعلان کیا کہ بلیقیئر-آریئٹا خاندان اور ہیڈوگ و سیموئل فشر کے تمام قانونی ورثاء کے درمیان باہمی رضامندی سے ایک منصفانہ معاہدہ طے پا گیا ہے۔
فشر خاندان کے ورثاء نے سوتھبیز اور فروخت کنندہ خاندان کے ساتھ ہونے والے بامقصد مذاکرات پر اظہارِ تشکر کرتے ہوئے کہا کہ اس تصفیے سے نازی دور میں ان کے خاندان کی تکالیف اور انصاف کے حصول کی طویل جدوجہد کو تسلیم کیا گیا ہے۔ وکیل گنار شنابیل نے کہا کہ اس معاملے کا تیز رفتار اور منصفانہ حل نازی دور کے مظالم کا شکار ہونے والے دیگر خاندانوں کے لیے بھی حوصلہ افزائی کا باعث بنے گا۔
نیا عالمی ریکارڈ؛ شہرہ آفاق مصور وین گوگ کی پینٹنگ 19 کروڑ ڈالر (تقریباً 53 ارب پاکستانی روپے) سے زائد میں نیلام

