اسلام آباد: وفاقی دارالحکومت اسلام آباد کی پولیس میں انتظامی سطح پر بڑے پیمانے پر تبدیلیاں کرتے ہوئے 15 پولیس افسران کے تقرر و تبادلے کر دیے گئے ہیں، جس کا باضابطہ نوٹیفکیشن انسپکٹر جنرل آف پولیس (آئی جی) اسلام آباد کی جانب سے جاری کر دیا گیا ہے۔
جاری کردہ نوٹیفکیشن کے مطابق انتظامی بنیادوں پر نوشیروان احسن منہاس اور علی رضا قریشی سمیت دو افسران کو عہدوں سے ہٹا کر سینٹرل پولیس آفس (سی پی او) کلوز کر دیا گیا ہے۔

نئی تعیناتیوں کے تحت دارالحکومت کے اہم سرکلز میں نئے سب ڈویژنل پولیس افسران (ایس ڈی پی اوز) تعینات کیے گئے ہیں، جن میں کیپٹن (ر) سہیل امین کو سیکرٹریٹ سرکل، محمد نعمان کو کورال سرکل جبکہ دُرِ تباش کو کوہسار سرکل کا ایس ڈی پی او مقرر کیا گیا ہے۔
اسی طرح محمد آصف کو رمنہ سرکل، سہیل احمد اعوان کو انڈسٹریل ایریا سرکل اور نور الاسلام کو شہزاد ٹاؤن سرکل کی ذمہ داریاں سونپ دی گئی ہیں۔
نوٹیفکیشن کے مطابق دیگر افسران کو بھی سکیورٹی، آپریشنز، ٹریفک، ہیڈکوارٹرز، فیڈرل پریزن، ٹیلی کمیونیکیشن اور اینٹی رائٹ فورس (اے آر ایف) سمیت اہم شعبوں میں تعینات کیا گیا ہے۔ آئی جی اسلام آباد کے احکامات کے تحت تمام تقرر و تبادلے فوری طور پر نافذ العمل ہوں گے۔
اسلام آباد پولیس میں بڑے پیمانے پر اکھاڑ پچھاڑ؛ 15 افسران کے تقرر و تبادلے، متعدد سرکلز کے ایس ڈی پی اوز تبدیل، نوٹیفکیشن جاری

