ویب ڈیسک:
پاکستان کی نامور سندھی لوک گلوکارہ شازیہ خشک، جنہوں نے اپنی منفرد آواز میں ’لال میری پت‘ اور ’دانے پہ دانا‘ جیسے مقبول گیتوں سے دنیا بھر میں شناخت بنائی، اب گلوکاری اور شوبز کی دنیا کو الوداع کہہ کر ایک سادہ اور پُرسکون زندگی گزار رہی ہیں۔
500 سے زائد گیت ریکارڈ کرانے اور 45 ممالک میں اپنے فن کا مظاہرہ کرنے والی شازیہ خشک حال ہی میں ایک فیسٹیول کے دوران اپنے چھوٹے سے اسٹال پر نظر آئیں، جہاں وہ عبایا اور نقاب میں ملبوس ہو کر خوشبو، کریمیں، ملبوسات اور جیولری سمیت دیگر اشیاء خود فروخت کر رہی تھیں۔
میڈیا سے گفتگو کرتے ہوئے شازیہ خشک نے اپنی زندگی میں آنے والی تبدیلی کی تفصیلات بتاتے ہوئے کہا کہ انہوں نے 2018 میں گلوکاری چھوڑنے کا مکمل فیصلہ کر لیا تھا اور گھر سے صرف قرآنِ پاک اٹھا کر نکل پڑی تھیں۔
ان کا کہنا تھا کہ جنید جمشید کی وفات نے ان کی سوچ اور زندگی پر گہرا اثر ڈالا، جس کے بعد ان کے خیالات میں تبدیلی آئی اور انہوں نے آہستہ آہستہ پردہ شروع کر دیا۔ ان کے جڑواں بچے اس وقت بیرونِ ملک مقیم ہیں۔
اپنی موجودہ زندگی پر اطمینان کا اظہار کرتے ہوئے شازیہ خشک نے کہا کہ "اللہ کبھی کسی کو اکیلا نہیں چھوڑتا، اس نے میرا ہاتھ پکڑ لیا۔” ان کے مطابق شہرت کے بڑے اسٹیج کے مقابلے میں انہیں اصل سکون اب اس چھوٹے سے اسٹال پر ملا ہے۔

