گواہاٹی:
بھارتی ریاست آسام کے دارالحکومت گواہاٹی کے قریب ایک بڑا ریل حادثہ پیش آیا ہے، جہاں کولکاتہ سے سیرانگ جانے والی کولکاتہ-سیرانگ ایکسپریس (Kolkata-Sairang Express) پٹری سے اتر گئی۔ حادثے میں ٹرین کا انجن اور تقریباً 7 بوگیاں پٹری سے نیچے اتر گئیں، جس کے نتیجے میں متعدد مسافروں کے زخمی ہونے کی اطلاعات ہیں۔
اطلاعات کے مطابق یہ حادثہ بدھ کی صبح گواہاٹی کے قریب ڈیگارو (Digaru) ریلوے اسٹیشن کے نزدیک پیش آیا۔ حادثے کے فورا بعد ریلوے حکام اور امدادی ٹیمیں موقع پر پہنچ گئیں اور زخمی مسافروں کو فوری طور پر طبی امداد فراہم کرتے ہوئے قریبی اسپتال منتقل کیا جا رہا ہے۔
نارتھ ایسٹ فرنٹیر ریلوے (NFR) کے اعلیٰ حکام بھی موقع پر پہنچ چکے ہیں۔ ریلوے ترجمان کا کہنا ہے کہ متاثرہ مسافروں کو متبادل ٹرین کے ذریعے ان کی منزل کی طرف روانہ کرنے کے انتظامات کیے جا رہے ہیں، جبکہ ٹریک کی بحالی کا کام تیزی سے جاری ہے۔ حادثے کی وجوہات جاننے کے لیے انکوائری کے احکامات جاری کر دیے گئے ہیں۔