چکوال (مہتاب نصیر اعوان سے)
ضلع چکوال میں نئے تعینات ہونے والے ڈسٹرکٹ پولیس آفیسر چکوال محمد عاصم جسرا (PSP) سے ضلع بھر کے صحافیوں کی پہلی باضابطہ تعارفی ملاقات پولیس لائنز چکوال میں منعقد ہوئی۔ اس تقریب میں چکوال، تلہ گنگ، کلر کہار، چوآ سیدن شاہ، لاوہ اور ڈھڈیال سمیت ضلع بھر سے پرنٹ و الیکٹرانک میڈیا کے نمائندگان اور صحافتی تنظیموں کے عہدیداران نے بڑی تعداد میں شرکت کی۔ ڈی پی او نے عہدہ سنبھالنے کے محض تین روز بعد یہ ملاقات کر کے ایک مثبت روایت قائم کی۔
تقریباً ڈیڑھ گھنٹے جاری رہنے والے سوال و جواب کے سیشن میں صحافیوں نے عوامی مسائل، جرائم کی صورتحال اور پولیس کی کارکردگی پر کھل کر سوالات اٹھائے، جن کے ڈی پی او نے تفصیلی جوابات دیے۔
صحافیوں کی جانب سے بچیوں کے ساتھ زیادتی کے بڑھते واقعات، تھانہ ملہال مغلاں کی چودہ سال سے سست روی کا شکار تعمیر، دفعہ 376/377 کے فرضی مقدمات، تھانہ صدر کی حدود میں مویشی چوری، پیشہ ور بھکاریوں کی بھرمار اور منشیات فروشی میں اضافے جیسے اہم مسائل سامنے رکھے گئے۔ ڈی پی او محمد عاصم جسرا نے بچیوں کے تحفظ کو اولین ترجیح قرار دیا اور ملہال مغلاں تھانے کا نکتہ نوٹ کرتے ہوئے فوری پیش رفت کی یقین دہانی کرائی۔
اس موقع پر گفتگو کرتے ہوئے ڈی پی او نے دوٹوک الفاظ میں کہا کہ چکوال پولیس میں میرٹ، شفافیت اور خود احتسابی پر کوئی سمجھوتہ نہیں ہوگا، روڈ سیفٹی میری ترجیحات میں سرفہرست ہے اور منشیات فروشوں سمیت جرائم پیشہ عناصر کے خلاف کارروائیوں میں تیزی لائی جائے گی، جبکہ زیادتی کے جھوٹے مقدمات بنا کر بلیک میل کرنے والوں کے خلاف قانون سختی سے حرکت میں آئے گا۔ انہوں نے مزید کہا کہ "صحافیوں کے لیے میرے دفتر کے دروازے ہر وقت کھلے ہیں، مجھے تعریفیں سننے کا کوئی شوق نہیں، عوامی مسائل اور جائز شکایات مجھ تک پہنچائیں، ان کا فوری ازالہ ہوگا۔”
ملاقات کے دوران ڈی ایس پی لیگل علی عباس، ڈی ایس پی عبدالغفار، انسپکٹر عابد حسین، ریڈر ٹو ڈی پی او سب انسپکٹر واجد اور پی آر او پولیس فہد خان سمیت دیگر پولیس افسران بھی موجود تھے۔ جب کہ شریک صحافیوں میں راجہ شہزاد حمید، چوہدری سہیل ہارون، صغیر مغل، مہتاب نصیر اعوان، محمد اعجاز، خواجہ بابر سلیم محمود، محمد خان عاقل، ذوالفقار میر، راجہ افتخار احمد، راجہ فرحت بشیر ایڈووکیٹ، ساجد بلوچ، مہران ظفر ملک، راجہ ثاقب عباس، ڈاکٹر اعجاز، خواجہ دانیال سلیم محمود، فقیر خالد ملک، عبدالخالق درویش، راجہ تنویر حیدر، گل عباس، شفقت یزدانی، علی یزدانی، راجہ ذیشان، راجہ شبیر، ڈاکٹر زاہد عباس چوہدری، ممتاز احمد راجپوت، توقیر انور، کنور فاروقی، ملک عظمت حیات، محسن قیوم اور شیخ افضل اعوان سمیت ضلع بھر سے صحافیوں کی کثیر تعداد شامل تھی۔