شارجہ:
افغانستان اور زمبابوے کے درمیان شارجہ کرکٹ اسٹیڈیم میں کھیلے جانے والے دو میچوں پر مشتمل ٹیسٹ سیریز کے پہلے روز زمبابوے نے شاندار کھیل کا مظاہرہ کرتے ہوئے اپنی پوزیشن انتہائی مضبوط کر لی ہے۔ٹاس جیت کر پہلے بیٹنگ کا فیصلہ کرنے والی زمبابوے کی ٹیم نے پراعتماد انداز میں اننگز کا آغاز کیا۔ تجربہ کار بیٹر برینڈن ٹیلر نے ذمے دارانہ اور بہترین بیٹنگ کا مظاہرہ کرتے ہوئے شاندار سنچری (131 رنز) اسکور کی، جبکہ نوجوان کپتان برائن بینیٹ نے بھی عمدہ کھیل پیش کرتے ہوئے 71 رنز کی نصف سنچری اننگز کھیلی۔
اس کے علاوہ دیگر بلے بازوں میں بین کرن (42 رنز)، انوسینٹ کایا (34 رنز) اور ویزلے میڈہیور (29 رنز) نے بھی قیمتی رنز جوڑ کر ٹیم کے بڑے اسکور میں اہم کردار ادا کیا۔
دوسری جانب، افغان بولرز نے طویل سیشنز میں سخت محنت کی۔ بولنگ کے شعبے میں ضیاء الرحٰن نے عمدہ بولنگ کا مظاہرہ کرتے ہوئے 2 وکٹیں حاصل کیں، جبکہ محمد سلیم، حشمت اللہ شاہدی اور قیس احمد کے حصے میں ایک ایک وکٹ آئی۔
واضح رہے کہ اس ٹیسٹ سیریز سے قبل شارجہ میں ہی کھیلی گئی ٹی ٹوئنٹی سیریز میں افغانستان نے زمبابوے کو 0-3 سے شکست دی تھی، تاہم ٹیسٹ کے پہلے دن زمبابوے نے بہترین کم بیک کیا ہے۔