سیالکوٹ ۔سلیم احمد اعوان شیخو
پولیس نے گھر میں چوری کی بڑی واردات قلیل مدت میں ٹریس کر کے چوروں کو گرفتار کر لیا۔بتایا گیا ہے کہ تھانہ حاجی پورہ کے علاقہ درانی ٹاؤن کا رہائشی اسماعیل اپنے گھر والوں کے ہمراہ چکوال گیا ہوا تھا کہ اسماعیل اور دیگر گھر والوں کی عدم موجودگی میں نامعلوم چور نے گھر میں داخل ہو کر طلائی زیورات، غیر ملکی کرنسی، قیمتی گھڑیاں اور دیگر سامان چوری کر لیا۔ اطلاع ملنے پر مذکورہ تھانہ کی پولیس فوری نے مقدمہ درج کرکے تفتیش شروع کی۔ڈسٹرکٹ پولیس آفیسر سیالکوٹ کیپٹن (ر) دوست محمد نے شہری کے گھر میں چوری کی بڑی واردات کا نوٹس لیتے ہوئے سب ڈویژنل پولیس آفیسر اے ایس پی سٹی سرکل بشریٰ عزیز کو واردات کا سراغ لگانے اور مسروقہ مال کی بازیابی یقینی بنانے کا ٹاسک سونپ دیا تو اے ایس پی بشریٰ عزیز کی نگرانی میں ایس ایچ او تھانہ حاجی پورہ سب انسپکٹر کاشف بٹ اور ان کی ٹیم نے سیف سٹی کیمروں کی فوٹیجز، جائے وقوعہ سے حاصل کردہ فنگر پرنٹس، سی آر او ریکارڈ سے چہرے کی شناخت اور مخبر ذرائع سے حاصل معلومات کی مدد سے ملزم تک رسائی حاصل کی۔ مربوط تفتیش اور بروقت کارروائی کے نتیجے میں ملزم علی صیام ولد کرامت علی کو گرفتار کر لیا گیا۔
ملزم کی نشاندہی پر ایک کروڑ روپے مالیت کے 20 تولے طلائی زیورات، غیر ملکی کرنسی، قیمتی گھڑیاں اور دیگر مسروقہ سامان برآمد کرکے اصل مالک کے حوالے کر دیا گیا جبکہ چور سے مزید تفتیش جاری ہے۔ متاثرہ شہری نے فوری داد رسی اور قیمتی مال کی مکمل واپسی پر ڈسٹرکٹ پولیس آفیسر اور پولیس ٹیم کا شکریہ ادا کیا ہے۔
ڈسٹرکٹ پولیس آفیسر سیالکوٹ کیپٹن (ر) دوست محمد نے کہا کہ شہریوں کی جان و مال کا تحفظ ہماری اولین ذمہ داری ہے۔ کسی خاندان کی محنت کی کمائی واپس دلانا اس کے اعتماد اور احساسِ تحفظ کو بحال کرنا ہے۔ سیالکوٹ پولیس جرائم پیشہ افرادکی گرفتاری کے ساتھ شہریوں کے مسروقہ اثاثوں کی بازیابی کے لیے بھی پوری ذمہ داری اور مستعدی سے کام کرتی رہے گی۔