پشاور:انورزیب خان
محکمہ جیل خانہ جات خیبر پختونخوا میں ملازمین کی ترقی اور کیریئر پروگریشن کے حوالے سے ایک تاریخی اور اہم پیش رفت سامنے آئی ہے۔انسپکٹر جنرل (IG) جیل خانہ جات خیبر پختونخوا، ریحان گل خٹک کی زیرِ صدارت محکمانہ کمیٹی کا ایک انتہائی اہم اجلاس منعقد ہوا، جس میں ملازمین کی ترقی کے موجودہ سروس رولز میں مجوزہ ترامیم پر تفصیلی غور کیا گیا۔ اجلاس کے دوران وارڈر (BPS-07) سے لے کر اسسٹنٹ سپرنٹنڈنٹ جیل (BPS-16) تک کے عہدوں پر ترقی کے طریقۂ کار کو انقلابی انداز میں تبدیل کرنے کا فیصلہ کیا گیا۔ذرائع کے مطابق، اجلاس میں یہ تاریخی فیصلہ کیا گیا ہے کہ اہل، باصلاحیت اور اعلیٰ تعلیم یافتہ ملازمین کو میرٹ اور کارکردگی کی بنیاد پر مساوی مواقع فراہم کرنے کے لیے فاسٹ ٹریک پروموشن کا ایک شفاف نظام متعارف کرایا جائے گا۔
اس مقصد کے لیے ایٹا (ETEA) یا پبلک سروس کمیشن خیبر پختونخوا کے ذریعے مسابقتی امتحانات اور مناسب کوٹے کی تشکیل پر مشتمل سروس رولز کا نظرثانی شدہ مسودہ جلد از جلد محکمہ داخلہ کو ارسال کیا جائے گا۔اجلاس میں ڈی آئی جی (ہیڈکوارٹرز) نیلم سلطانہ خٹک، ڈی آئی جی امین شعیب، ڈی آئی جی پشاور ریجن بیت اللّٰہ خان، ڈی آئی جی سوات ریجن بخت روان اور دیگر اعلیٰ افسران نے شرکت کی۔
آئی جی جیل خانہ جات ریحان گل خٹک نے واضح ہدایات جاری کرتے ہوئے کہا کہ سروس رولز میں ترامیم کے اس مسودے کو بلا تاخیر محکمہ داخلہ کو بھیجا جائے تاکہ جیل وارڈرز اور دیگر ماتحت عملے کے لیے ترقی کی نئی راہیں جلد از جلد ہموار کی جا سکیں اور محکمے میں میرٹ کی بالادستی کو یقینی بنایا جا سکے۔
