خوشاب (راجہ نورالہی عاطف سے)
ڈپٹی کمشنر خوشاب ڈاکٹر جہانزیب حسین لابر کی زیر صدارت ڈی سی آفس کے کانفرنس ہال میں ڈسٹرکٹ ایجوکیشن اتھارٹی کا اہم اجلاس منعقد ہوا۔ اجلاس میں اساتذہ کی ہارڈ شپ ٹرانسفرز، پرائیویٹ اسکولوں کی قواعد و ضوابط کے تحت رجسٹریشن کے عمل اور دیگر تعلیمی امور کا تفصیلی جائزہ لیا گیا۔اجلاس کے دوران چیف ایگزیکٹو آفیسر (سی ای او) ایجوکیشن محمد عیسیٰ لالی اور اسسٹنٹ محکمہ تعلیم محمد قاسم خان نے ڈپٹی کمشنر کو ٹیچرز کی ہارڈ شپ ٹرانسفر کے عمل، پرائیویٹ اسکولوں کی نئی رجسٹریشن، تجدیدِ رجسٹریشن، مقررہ ٹائم لائنز اور رولز آف بزنس کے حوالے سے تفصیلی بریفنگ دی۔ڈپٹی کمشنر ڈاکٹر جہانزیب حسین لابر نے سی ای او ایجوکیشن کو واضح ہدایات جاری کرتے ہوئے کہا کہ قانون کی حکمرانی (رول آف لاء) کو یقینی بنایا جائے اور مقررہ پالیسی پر پورا اترنے والے اساتذہ کے جائز کاموں میں کسی قسم کی رکاوٹ نہ ڈالی جائے۔ اجلاس کے دوران ڈپٹی کمشنر نے اساتذہ کی ہارڈ شپ ٹرانسفرز کی باضابطہ منظوری بھی دے دی۔علاوہ ازیں، ڈپٹی کمشنر نے ضلع خوشاب کے سرکاری اسکولوں میں زیر تعلیم بچوں کے تعلیمی معیار کو مزید بلند کرنے کے لیے مؤثر اور عملی اقدامات اٹھانے کے بھی احکامات جاری کیے۔