ویب ڈیسک:
بالی ووڈ کے معروف اداکار ٹائیگر شراف کی گاڑی پر ہونے والی اندھا دھند فائرنگ کے کیس میں قانون نافذ کرنے والے اداروں نے ایک اور بڑی کامیابی حاصل کرتے ہوئے اس ہائی پروفائل حملے کے ماسٹر مائنڈ کے انتہائی قریبی ساتھی کو دبوچ لیا ہے۔ذرائع کے مطابق پولیس اور قانون نافذ کرنے والے اداروں نے اس خطرناک حملے کے مبینہ ماسٹر مائنڈ انل پنڈت — جو مبینہ طور پر گینگسٹر لارنس بشنوئی نیٹ ورک سے منسلک ہے — کے ایک اور اہم سہولت کار اور قریبی ساتھی کو گرفتار کر لیا ہے۔ اس گرفتاری کو کیس کی تفتیش میں ایک اہم موڑ قرار دیا جا رہا ہے۔واضح رہے کہ اس سے قبل پولیس نے انتہائی پھرتی کا مظاہرہ کرتے ہوئے واقعے میں ملوث تینوں شوٹرز کو راجستھان کے شہر کوٹا سے اس وقت دبوچ لیا تھا جب وہ فرار ہونے کی کوشش کر رہے تھے۔ ابتدائی تحقیقات میں یہ بات سامنے آئی تھی کہ ملزمان کو بیرون ملک چھپے بیٹھے انل پنڈت کی جانب سے براہ راست ہدایات اور بھاری مالی اعانت فراہم کی جا رہی تھی۔قانون نافذ کرنے والے اداروں کا کہنا ہے کہ اس گینگ کے تمام کارندوں، سہولت کاروں اور مالی معاونت کرنے والے نیٹ ورک کو جڑ سے اکھاڑ پھینکنے کے لیے تحقیقات کا دائرہ مزید وسیع کر دیا گیا ہے اور جلد مزید اہم انکشافات متوقع ہیں۔