برطانیہ میں امریکی اڈے پر دہشتگردی میں ملوث برطانوی-ایرانی شہری گرفتار،

لندن: برطانیہ کی کاؤنٹر ٹیررازم پولیس نے آر اے ایف فیئرفورڈ (RAF Fairford) فضائی اڈے کے خلاف دہشتگردی کی بڑی کارروائی کی تیاری کرنے کے شبے میں ایک برطانوی-ایرانی شخص کو گرفتار کر لیا ہے۔
پولیس کے مطابق 27 سالہ مشتبہ شخص کو لندن کے علاقے ویسٹ منسٹر سے حراست میں لیا گیا ہے، جبکہ ایک 26 سالہ برطانوی شہری سے بھی اس معاملے پر تفتیش کی گئی ہے اور متعلقہ علاقوں میں دو جائیدادوں کی تلاشی کا عمل بھی مکمل کر لیا گیا ہے۔
کاؤنٹر ٹیررازم پولیس کی سینیئر کوآرڈینیٹر وکی ایونز نے میڈیا سے گفتگو کرتے ہوئے بتایا کہ پولیس اس کیس کے تمام ممکنہ پہلوؤں سے سنجیدگی سے تفتیش کر رہی ہے، جس میں کسی غیر ملکی ریاست کے ممکنہ کردار کا زاویہ بھی شامل ہے۔ ان کا کہنا تھا کہ گلوسٹرشائر میں پیش آنے والے یہ واقعات انتہائی پیچیدہ نوعیت کے ہیں اور ہماری ماہر ٹیمیں دن رات اس کی گہرائی تک پہنچنے کی کوشش کر رہی ہیں۔
یاد رہے کہ اس سے قبل اتوار کے روز گلوسٹرشائر میں واقع امریکی فضائیہ کے زیرِ انتظام اس فضائی اڈے کے قریب سے بیس سے زائد عمر کے پانچ برطانوی شہریوں کو بھی گرفتار کیا گیا تھا، جو فی الحال ضمانت پر ہیں۔ حکام کے مطابق یہ کارروائی اس وقت عمل میں لائی گئی تھی جب اڈے کی جانب تین مشتبہ گاڑیوں کے بڑھنے کی اطلاع موصول ہوئی تھی۔
برطانوی پولیس نے سکیورٹی کے پیشِ نظر تحقیقات کا دائرہ مزید وسیع کر دیا ہے جبکہ عوام سے بھی اپیل کی گئی ہے کہ وہ اس دوران تحمل اور تعاون کا مظاہرہ کریں۔