اسلام آباد (نیوز ڈیسک): حکومت نے ملک بھر میں مختلف شعبوں اور صارف طبقات کے لیے یکساں گیس ٹیرف نافذ کرنے کے حوالے سے عالمی مالیاتی فنڈ (آئی ایم ایف) سے باضابطہ منظوری لینے کا فیصلہ کیا ہے۔
ذرائع کے مطابق اس فیصلے کا بنیادی مقصد توانائی کے شعبے میں کراس سبسڈی کے نظام کو ختم کرنا اور گیس کے شعبے میں بڑھتے ہوئے گردشی قرضے (Circular Debt) پر قابو پانا ہے۔ تجویز کے تحت صنعتی، تجارتی اور گھریلو صارفین کے لیے نرخوں کی ساخت میں یکسانیت اور شفافیت لائی جائے گی۔
حکام کا کہنا ہے کہ آئی ایم ایف کے ساتھ طے شدہ معاشی اصلاحاتی پروگرام کے تحت قیمتوں میں کسی بھی قسم کی تبدیلی یا پالیسی شفٹ کے لیے فنڈ کی موافقت ضروری ہے۔ اس لیے آئندہ جائزہ مذاکرات کے دوران اس منصوبے کی حتمی منظوری لی جائے گی، جس کے بعد یکساں ٹیرف کا باقاعدہ اطلاق کیا جائے گا۔