نئی دہلی: بھارت میں 600 سالہ قدیم تاریخی مسجد کو ممکنہ طور پر گرائے جانے کے خدشے کے پیشِ نظر ہزاروں مسلمان مسجد کے احاطے میں جمع ہو گئے اور عمارت کی حفاظت کے لیے اندر بیٹھ کر پرامن احتجاج شروع کر دیا۔
مقامی ذرائع کے مطابق انتظامیہ کی جانب سے مسجد کے خلاف اقدام کی خبریں پھیلتے ہی علاقے کے باشندے اور نمازی بڑی تعداد میں مسجد پہنچنا شروع ہو گئے۔ مظاہرین کا کہنا ہے کہ یہ مسجد نہ صرف ان کی عبادت گاہ ہے بلکہ یہ خطے کی تاریخ اور ثقافتی ورثے کی اہم ترین علامت ہے، جسے کسی صورت نقصان نہیں پہنچانے دیا جائے گا۔
مسجد کے اندر موجود لوگوں نے عبادات اور ذکر و اذکار کا سلسلہ جاری رکھا ہوا ہے تاکہ ماحول پرامن رہے۔ دوسری جانب انتظامیہ اور مقامی نمائندوں کے درمیان صورتحال کو سنبھالنے اور خدشات کو دور کرنے کے لیے مذاکرات کی کوششیں جاری ہیں۔