پریٹوریا (نیوز ڈیسک)
پہلا واقعہ جوہانسبرگ کے وادیلا ٹاؤن شپ میں پیش آیا، جہاں ایک بار میں اندھا دھند فائرنگ کے نتیجے میں کم از کم 17 افراد ہلاک ہو گئے۔ دوسرا واقعہ کیپ ٹاؤن میں پیش آیا، جہاں 10 افراد ہلاک ہوئے ہیں۔
جنوبی افریقہ کے دو مختلف شہروں میں مسلح افراد کی جانب سے کی جانے والی اجتماعی فائرنگ کے نتیجے میں کم از کم 27 افراد ہلاک جبکہ متعدد شدید زخمی ہو گئے ہیں۔
مقامی پولیس اور امدادی اداروں کے مطابق فائرنگ کے ہولناک واقعات یکے بعد دیگرے پیش آئے، جہاں نامعلوم مسلح ملزمان نے اچانک فائرنگ کر کے شہریوں کو نشانہ بنایا۔ واقعے کی اطلاع ملتے ہی سیکیورٹی فورسز اور ریسکیو ٹیمیں موقع پر پہنچ گئیں اور لاشوں و زخمیوں کو فوری طور پر قریب ترین ہسپتال منتقل کیا، جہاں چند زخمیوں کی حالت تشویشناک بتائی جا رہی ہے۔
پولیس حکام نے دونوں علاقوں کا محاصرہ کر کے ملزمان کی گرفتاری کے لیے سرچ آپریشن شروع کر دیا ہے۔ فی الوقت فائرنگ کی وجوہات معلوم نہیں ہو سکیں اور نہ ہی کسی گروپ نے اس کی ذمہ داری قبول کی ہے۔ پولیس کا کہنا ہے کہ واقعے کی مختلف زاویوں سے تحقیقات کی جا رہی ہیں۔