لانگ مارچ موخر ؟ سہیل آفریدی آج اعلان کرینگے، بے نقاب کا اعزاز ، ایک روز پہلے خبر بریک کی

پاکستان تحریک انصاف کے 27 ستمبر کے لانگ مارچ کے حوالے سے آج اہم پیش رفت متوقع ہے، وزیراعلیٰ خیبر پختونخوا سہیل آفریدی آج لانگ مارچ کے کو موخر کرنے کے حوالے سے اہم اعلان کریں گے۔ یادرہے بے نقاب نیوز نے اس حوالے سے رات کوہی خبر دے دی تھی ۔
یہ بھی پڑھیں :
اسلام آباد احتجاج؛ ایک ہفتے کی تاخیر سے سیکیورٹی پلان دباؤ میں آنے کا امکان
ذرائع کے مطابق خیبر پختونخوا کے ارکان نے لانگ مارچ مؤخر کرنے کا مشورہ دیا ہے اور تجویز پیش کی ہے کہ مارچ ملتوی کرکے اکتوبر کے آغاز میں آل پارٹیز کانفرنس بلائی جائے۔
پشاور میں ہونے والے اہم اجلاس میں لانگ مارچ کے معاملے پر تفصیلی مشاورت کی گئی، جبکہ اسلام آباد میں موجود تحریک انصاف کی مرکزی قیادت نے اپوزیشن جماعتوں کے درمیان باہمی رابطے مزید مضبوط بنانے پر بھی اتفاق کیا۔
دوسری جانب 27 ستمبر کے لانگ مارچ سے نمٹنے کے لیے وفاقی حکومت نے بھی انتظامی اور سیاسی اقدامات کا جائزہ لینا شروع کردیا ہے۔
دریں اثنا اسلام آباد میں وفاقی وزرا کی اہم بیٹھک ہوئی، جس میں لانگ مارچ کے حوالے سے مختلف امور پر غور کیا گیا۔
اجلاس کی صدارت وفاقی وزیر قانون اعظم نذیر تارڑ اور وزیر مملکت داخلہ طلال چوہدری نے کی، جس میں اعلیٰ حکام نے شرکت کی۔
اجلاس میں لانگ مارچ کے تناظر میں پنجاب حکومت کی جانب سے انٹرنیٹ سروس بند کرنے سے متعلق درخواست کا بھی جائزہ لیا گیا۔
ذرائع کا کہنا ہے کہ اجلاس میں انٹرنیٹ سروس فوری طور پر بند نہ کرنے پر اتفاق کیا گیا، جبکہ حکومت نے فی الحال ’انتظار کرو اور دیکھو‘ کی پالیسی اختیار کرنے کا فیصلہ کیا ہے۔
ذرائع کے مطابق تحریک انصاف کی قیادت سے بات چیت کا آپشن بھی زیر غور آیا، تاہم لانگ مارچ کے حوالے سے حتمی صورت حال وزیراعلیٰ خیبر پختونخوا سہیل آفریدی کے آج کے اعلان کے بعد واضح ہوگی۔