واشنگٹن: امریکی وزارتِ دفاع (پینٹاگون) اور میڈیا کے درمیان کشیدگی اس وقت عروج پر پہنچ گئی جب ایک رپورٹ میں دعویٰ کیا گیا کہ ایران کے ساتھ جاری جنگ میں مشرق وسطیٰ میں مرنے والے امریکی فوجیوں کی تعداد پینٹاگون کے بتائے گئے اعداد و شمار سے کہیں زیادہ ہے۔ اس سنسنی خیز انکشاف کے بعد امریکی وزیر دفاع پیٹ ہیگسیتھ نے سوشل میڈیا پر شدید ردعمل ظاہر کرتے ہوئے رپورٹ کو جھوٹ کا پلندہ قرار دیا ہے۔
This is DISGUSTING and FAKE. A complete LIE.
Shame on the Washington Post — they’re worse than Iranian state media. https://t.co/vU9OkSOnLB
— Pete Hegseth (@PeteHegseth) September 18, 2026
معتبر اخبار ’واشنگٹن پوسٹ‘ کی رپورٹ کے مطابق، 28 فروری کو امریکہ اور اسرائیل کی جانب سے ایران کے خلاف جنگ شروع ہونے کے بعد سے اب تک کم از کم 22 امریکی فوجی ہلاک ہو چکے ہیں، جو کہ پینٹاگون کے سرکاری دفاعی جانی نقصان کے نظام (DCAS) میں درج اعداد و شمار سے 4 زیادہ ہیں۔ رپورٹ میں گمنام رہنے کی شرط پر پانچ امریکی عہدیداروں کا حوالہ دیا گیا ہے، جبکہ ایک چھٹے عہدیدار کا کہنا ہے کہ مرنے والوں کی یہ تعداد 23 تک بھی ہو سکتی ہے۔
رپورٹ سامنے آنے کے بعد امریکی وزیر دفاع پیٹ ہیگسیتھ نے سوشل میڈیا پلیٹ فارم ‘ایکس’ (ٹوئٹر) پر شدید غصے کا اظہار کرتے ہوئے لکھا: "یہ گھناؤنا اور جعلی ہے۔ ایک مکمل جھوٹ ہے! واشنگٹن پوسٹ کو ڈوب مرنا چاہیے—یہ ایرانی سرکاری میڈیا سے بھی بدتر ہیں۔” دوسری جانب، پینٹاگون نے ہلاکتوں کے اعداد و شمار میں اس تضاد سے متعلق اخبار کے سوالات کا جواب دینے سے گریز کیا ہے۔
پیٹ ہیگسیتھ کو اس تنازع کے علاوہ بھی شدید سیاسی دباؤ کا سامنا ہے، اور اسی ہفتے ریپبلکن کانگریس مین تھامس میسی (Thomas Massie) نے ان کے خلاف مواخذے کی تحریک (Impeachment Articles) ایوان میں پیش کر دی ہے۔ تھامس میسی کا الزام ہے کہ پینٹاگون نے کانگریس کی منظوری کے بغیر ایران کے خلاف جنگ شروع کی اور کیریبین میں مبینہ منشیات کی کشتیوں پر حملے کیے، جو اختیارات کا غلط استعمال ہے۔
تاہم، ایوانِ نمائندگان کے اسپیکر مائیک جانسن کی جانب سے اراکین کو قبل از وقت گھر بھیجنے کے باعث تھامس میسی کی اس مواخذے کی تحریک اور جیفری ایپسٹین کی تحقیقات سے متعلق فائلوں کی ریلیز کی قرارداد پر اب وسط مدتی انتخابات کے بعد ہی کوئی بات ہو سکے گی۔ اسپیکر مائیک جانسن نے میسی کی اس کوشش کو "ایک سیاسی اسٹنٹ” قرار دیتے ہوئے وزیر دفاع پیٹ ہیگسیتھ کی کارکردگی کی زبردست تحسین کی ہے اور کہا ہے کہ وہ وزارتِ جنگ میں بہترین کام کر رہے ہیں۔