مسلم لیگ ن کی اعلیٰ قیادت کا آزاد کشمیر کے نو منتخب وزیراعظم اور سپیکر کے لیے نیک خواہشات کا اظہار، عوام کے مسائل فوری حل کرنے پر زور
لاہور / اسلام آباد: پاکستان مسلم لیگ (ن) کے صدر محمد نواز شریف، وزیراعظم محمد شہباز شریف اور وزیر اعلیٰ پنجاب مریم نواز شریف سے آزاد جموں و کشمیر کے نو منتخب وزیراعظم افتخار گیلانی اور سپیکر طارق فاروق نے اہم ملاقات کی ہے۔ اس موقع پر آزاد کشمیر کی قیادت نے مسلم لیگ ن کی اعلیٰ قیادت کی جانب سے ان پر اعتماد کا اظہار کرنے اور بھرپور حمایت پر شکریہ ادا کیا، جبکہ مسلم لیگ ن کے قائدین نے انہیں منصب سنبھالنے پر مبارکباد دیتے ہوئے نیک تمناؤں کا اظہار کیا۔
پاکستان مسلم لیگ ن کے صدر محمد نواز شریف، وزیراعظم محمد شہباز شریف اور وزیر اعلیٰ پنجاب مریم نواز شریف سے آزاد جموں و کشمیر کے وزیر اعظم افتخار گیلانی اور سپیکر طارق فاروق کی ملاقات
آزاد جموں و کشمیر کے وزیر اعظم افتخار گیلانی اور سپیکر طارق فاروق نے اظہار اعتماد پر پاکستان مسلم… pic.twitter.com/LbnmjQPvts— Marriyum Aurangzeb (@Marriyum_A) August 30, 2026
ملاقات کے دوران آزاد کشمیر کے عوام کو درپیش بنیادی مسائل کے فوری حل کی ضرورت پر زور دیا گیا۔ قائدِ مسلم لیگ (ن) محمد نواز شریف نے آزاد کشمیر میں گورننس کو بہتر بنانے اور عوامی فلاح و بہبود کے لیے ایک جامع پہلے 100 دنوں پر مشتمل اصلاحاتی منصوبہ وزیرِ اعظم آزاد کشمیر کے ساتھ شیئر کیا۔ اس پلان کا مقصد صحت، تعلیم، صفائی، انفراسٹرکچر اور دیگر اہم شعبوں میں فوری اور نمایاں بہتری لانا ہے۔
نواز شریف اور وزیراعظم شہباز شریف نے اس عزم کا اعادہ کیا کہ جس طرح پنجاب میں عوام کو سہولیات فراہم کرنے اور ترقی کے نئے ریکارڈ قائم کیے جا رہے ہیں، اسی طرح آزاد جموں و کشمیر کو بھی جدت اور تیز رفتار ترقی کی راہ پر گامزن کیا جائے گا۔ وزیر اعلیٰ مریم نواز شریف نے بھی آزاد کشمیر کی نئی قیادت کو ہر ممکن تعاون اور پنجاب کے انتظامی تجربات سے استفادہ کرنے کی یقین دہانی کرائی۔