ممبر قومی اسمبلی کی مفتی ڈاکٹر محمد یونس رضوی، صاحبزادہ پیر فضل رسول حیدر رضوی، سعید انور بھولا، چوہدری آفتاب اکبر، نعمان خان اور ملک مقصود احمد کے ہمراہ گفتگو
جڑانوالہ (تحصیل رپورٹر حا جی عبد الرزاق)
ممبر قومی اسمبلی بلال بدر چوہدری نے کہا ہے کہ سکونِ قلب کے لیے اپنے گھروں میں ذکرِ الٰہی اور ذکرِ مصطفیٰ ﷺ کی محفلیں سجانی چاہئیں کیونکہ حضور اکرم ﷺکی زندگی ہمارے لیے مشعلِ راہ ہے۔ آج پوری قوم کو متحد ہو کر دہشت گردی کے خاتمے کے لیے عسکری قیادت کے ساتھ کھڑا ہونا چاہیے جبکہ فرقہ واریت کے خاتمے کے لیے علماء کرام کو عوام میں شعور بیدار کرنا ہوگا۔ان خیالات کا اظہار انہوں نے تحریکِ اہل سنت پاکستان کے ناظمِ اعلیٰ مفتی ڈاکٹر محمد یونس رضوی، صاحبزادہ پیر فضل رسول حیدر رضوی، جنرل سیکرٹری مسلم لیگ (ن) سعید انور بھولا، چوہدری آفتاب اکبر، نعمان خان اور ملک مقصود احمد کے ہمراہ گفتگو کرتے ہوئے کیا۔بلال بدر چوہدری نے جڑانوالہ کے علماء کرام اہلِ سنت کی علمی و ادبی خدمات کو سراہتے ہوئے کہا کہ آج کے اس نفسا نفسی کے دور میں فروغِ عشقِ مصطفیٰ ﷺ کے لیے ایسی محافل کا انعقاد مسلمانوں کے دلوں کو منور کرتا ہے۔ انہوں نے کہا کہ لوگ دین سے دوری کی وجہ سے بے پناہ مشکلات اور مسائل کا شکار ہو رہے ہیں۔مفتی ڈاکٹر محمد یونس رضوی ناظم اعلی تحریک اہلسنت پاکستان نے کہا کہ نبی آخر الزماں حضرت محمد مصطفیٰ ﷺ دنیا میں نور بن کر تشریف لائے، جن کے نور سے پوری دنیا میں اجالا ہوا اور جہالت کے اندھیرے ختم ہوئے۔ حضور اکرم ﷺ کی زندگی ہمارے لیے کامل نمونہ ہے، اس لیے ہمیں سیرت النبی ﷺ اور عشقِ مصطفیٰﷺکے فروغ کے لیے ایسی دینی و روحانی محافل کا اہتمام کرنا چاہیے۔صاحبزادہ پیر فضل رسول حیدررضوی نے کہا کہ ان محافل میں شرکت کے ذریعے دین سے بھٹکے ہوئے لوگ قرآن و سنت کی تعلیمات سے روشناس ہو کر اپنی زندگیوں کو اسلامی تعلیمات کے مطابق ڈھال سکتے ہیں۔ دین کی پیروی اور اعلیٰ اخلاقی اقدار ہی انسان کو اشرف المخلوقات کے مقام سے آگاہ کرتی ہیں اور معاشرے میں امن، محبت، بھائی چارے اور اتحاد کو فروغ دیتی ہیں۔