اسلام آباد میں 20 کلو آٹے کا تھیلا 3,133 روپے میں خضدار، بہاولپور، حیدرآباد کوئٹہ اور پشاور میں بھی مہنگائی کے ریکارڈ ٹوٹ گئے
اسلام آباد:ملک میں بڑھتی ہوئی مہنگائی کے ستائے عوام کے لیے ایک اور بری خبر سامنے آئی ہے۔ ادارہ شماریات نے آٹے کی قیمتوں سے متعلق تازہ ترین اعداد و شمار جاری کر دیے ہیں، جن کے مطابق ملک کے مختلف شہروں میں ایک ہی ہفتے کے دوران 20 کلو آٹے کے تھیلے کی قیمت میں 100 روپے تک کا نمایاں اضافہ ریکارڈ کیا گیا ہے۔
ادارہ شماریات کی رپورٹ کے مطابق، اس وقت وفاقی دارالحکومت اسلام آباد ملک کا وہ شہر بن چکا ہے جہاں آٹا سب سے زیادہ مہقے داموں فروخت ہو رہا ہے۔ اسلام آباد میں 20 کلو آٹے کا تھیلا اب 3,133 روپے 33 پیسے کی بلند ترین سطح پر پہنچ چکا ہے۔ اسی طرح جڑواں شہر راولپنڈی میں بھی صورتحال مختلف نہیں ہے جہاں یہی تھیلا 3,093 روپے 33 پیسے تک میں فروخت ہو رہا ہے۔
مختلف شہروں میں آٹے کی موجودہ قیمتیں اور اضافے کا رجحان
رپورٹ کے مطابق حالیہ ہفتے کے دوران ملک کے مختلف حصوں میں آٹے کی قیمتوں میں ردوبدل دیکھا گیا ہے:
پشاور: یہاں آٹے کا 20 کلو کا تھیلا 3,100 روپے تک فروخت ہو رہا ہے۔
کراچی: مالیاتی حب کہے جانے والے شہرِ قائد میں بھی 20 کلو آٹے کی قیمت 3,000 روپے تک جا پہنچی ہے۔
بنوں: خیبرپختونخوا کے اس شہر میں آٹے کا تھیلا 2,900 روپے میں دستیاب ہے۔
کوئٹہ: کوئٹہ میں ایک ہفتے کے اندر 20 روپے اضافے کے بعد 20 کلو آٹا 2,700 روپے کا ہو گیا ہے۔
حیدرآباد اور سکھر: حیدرآباد میں قیمت بڑھ کر 2,880 روپے جبکہ سکھر میں 2,580 روپے ریکارڈ کی گئی ہے۔
لاہور: پنجاب کے دارالحکومت لاہور میں 20 کلو آٹے کا تھیلا نسبتاً کم یعنی 2,300 روپے میں فروخت ہو رہا ہے، جبکہ گوجرانوالہ، سیالکوٹ، سرگودھا، ملتان اور بہاولپور میں اس کی قیمت 2,800 روپے تک ریکارڈ کی گئی ہے۔
ادارہ شماریات کی جانب سے بتائی گئی تفصیلات کے مطابق خضدار میں ایک ہفتے کے دوران آٹے کے تھیلے کی قیمت میں سب سے زیادہ 100 روپے کا اضافہ ہوا ہے۔ اسی طرح بہاولپور میں 60 روپے، حیدرآباد میں 40 روپے اور لاڑکانہ و کوئٹہ میں 20 روپے تک فی تھیلا مہنگائی دیکھی گئی ہے۔ ملک بھر میں آٹے کی قیمتوں میں اس تضاد اور مسلسل اضافے کے باعث عام شہریوں کو شدید مالی مشکلات کا سامنا کرنا پڑ رہا ہے۔
اسی طرح سبزیاں اور پھل بھی عام آدمی کی پہنچ سے دورہوگئے ہیں ،کانداروں کا کہنا ہے کہ 2 ہفتوں میں سبزیوں اور پھلوں کی قیمتوں میں 100 سے 150 روپے فی کلو کا اضافہ ہوا ہے جبکہ پھلوں کی پیٹیوں کی قیمتوں میں ایک ہزار سے 2ہزار روپے تک کا اضافہ ہوا ہے۔
دکانداروں کا بتانا تھا کہ کدو 150 سے بڑھ کر 200 روپے، گوبھی 150 سے بڑھ کر 220 روپے کلو، بند گوبھی 150 سے بڑھ کر 250 روپے فی کلو اور میتھی 300 سے بڑھ کر 400 روپے کلو ہوگئی ہے۔اسی طرح شملہ مرچ 300 سے بڑھ کر 350، پیاز 120 سے بڑھ کر 200 روپے کلو اور ٹماٹر کی قیمت 200 سے بڑھ کر 250 روپے کلو تک ہو گئی ہے۔
دکانداروں نے پھلوں قیمت کے حوالے سے بتایا کہ آڑو کا 6 کلو کا کارٹن 950 روپے، سیب کی پیٹی 2 ہزار سے بڑھ کر 3 ہزار روپے، آم کی پیٹی 3 ہزار سے بڑھ کر 5 ہزار، انگور کی پیٹی 4500 سے بڑھ کر 5 ہزار روپے کی ہوگئی ہے۔
دکانداروں نے مزید بتایا کہ سبزیاں اور پھل منڈی سے ہی مہنگے مل رہے ہیں۔