راولپنڈی پولیس کی بڑی کامیابی: سوشل میڈیا اسٹار عائشہ گلامنہ کے قتل میں ملوث والد اور بھائی سمیت پانچ ملزمان گرفتار

راولپنڈی:(حاجی شفیق کی رپورٹ)

راولپنڈی پولیس نے سوشل میڈیا پر ‘عائشہ گلامنہ’ کے نام سے مشہور ٹک ٹاک اسٹار شمسو بی بی کے قتل کی اندھا دھند تفتیش میں ایک بہت بڑی کامیابی حاصل کرتے ہوئے مقتولہ کے اپنے ہی سگے والد اور حقیقی بھائی سمیت پانچ افراد کو گرفتار کر لیا ہے۔ پولیس کے مطابق اس خونی واقعے کے پیچھے نام نہاد غیرت کا عنصر کارفرما تھا۔
ایس ایس پی آپریشنز طارق محبوب نے ایک پریس کانفرنس کے دوران انکشاف کیا کہ گرفتار ہونے والے ملزمان میں مقتولہ کا والد فضل، حقیقی بھائی بشیر، چچا زاد بھائی احسان، والد کا چچا روزی خان اور چچا زاد بھائی کا بیٹا یاسین شامل ہیں۔ ابتدائی تحقیقات سے یہ بات سامنے آئی ہے کہ مقتولہ کے والد اور بھائی نے اپنے دیگر رشتہ داروں کے ساتھ مل کر منصوبہ بندی کے تحت عائشہ کو قتل کروایا اور قانون کی آنکھ میں دھول جھونکنے کے لیے ڈرامہ رچانے کی کوشش کی۔
سی پی او حسن مشتاق سکھیرا کی ہدایت پر تشکیل دی جانے والی خصوصی تفتیشی ٹیموں نے جدید ٹیکنالوجی اور روایتی طریقوں کا بھرپور استعمال کیا۔ پولیس نے وقوعہ کے گردونواح کے 100 سے زائد سی سی ٹی وی کیمروں کی فوٹیج کا باریک بینی سے جائزہ لیا۔
یاد رہے کہ 14 اگست کو ٹیکسلا میں اس وقت فائرنگ کا یہ واقعہ پیش آیا جب عائشہ اپنی 15 سالہ بہن عاصمہ اور بھائی نعمت اللہ کے ہمراہ گاڑی میں سوار ہو کر گھر سے نکلی تھیں۔ پیٹرول پمپ کے قریب موٹر سائیکل سوار ملزمان نے ان کی گاڑی پر اندھا دھند فائرنگ کر دی تھی، جس کے نتیجے میں عائشہ گردن پر گولی لگنے سے موقع پر ہی جاں بحق ہو گئی تھی جبکہ ان کی بہن زخمی ہو گئی تھی۔
پولیس نے شواہد کی روشنی میں جب خاندانی پس منظر اور حالات کا احاطہ کیا تو اس ہولناک واردات میں مقتولہ کے اپنے قریبی عزیز ملوث پائے گئے۔ حکام کا کہنا ہے کہ تمام ملزمان کے خلاف ٹھوس شواہد عدالت میں پیش کیے جائیں گے تاکہ انہیں کیفرِ کردار تک پہنچایا جا سکے۔
شمسو بی بی عرف عائشہ گلامنہ پچھلے تین چار سالوں سے سوشل میڈیا بالخصوص ٹک ٹاک پر کافی سرگرم تھیں۔ وہ اپنی ویڈیوز کی وجہ سے نوجوان طبقے میں بے حد مقبول تھیں اور ان کے فالوورز کی تعداد 13 لاکھ سے تجاوز کر چکی تھی جبکہ ان کی ویڈیوز کو کروڑوں کی تعداد میں لائکس ملے تھے۔ ان کی ناگہانی موت نے سوشل میڈیا صارفین اور ان کے مداحوں کو شدید صدمے سے دوچار کر دیا تھا۔