سیالکوٹ (سلیم احمد اعوان شیخو)
ڈپٹی کمشنر سیالکوٹ اویس مشتاق نے مون سون کی بارشوں کے پیشِ نظر عوامی تحفظ کو یقینی بنانے کے لئے ضلع بھر کے دریاؤں، نہروں، نالوں اور جوہڑوں میں نہانے، تیراکی اور کشتی رانی پر دفعہ 144 نافذ کر کے پابندی عائد کر دی ہے۔ یہ پابندی ایک ماہ کے لئے ضلع سیالکوٹ کی تمام ریونیو حدود میں فوراً نافذ العمل رہے گی۔ مون سون کے موسم میں دریاؤں، نہروں، نالوں اور جوہڑوں میں اچانک طغیانی اور پانی کے بہاؤ میں غیر معمولی اضافے کے باعث حادثات کا خدشہ بڑھ جاتا ہے۔ اس صورتحال میں انسانی جان و مال کے تحفظ اور کسی بھی ناخوشگوار واقعے سے بچاؤ کے لئے دفعہ 144 کا نفاذ ناگزیر قرار دیا گیا ہے۔نوٹیفکیشن میں واضح کیا گیا ہے کہ انتظامیہ کی جانب سے عائد کردہ ان پابندیوں کی خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔ڈپٹی کمشنر اویس مشتاق نے شہریوں، بالخصوص والدین سے اپیل کی ہے کہ وہ اپنے بچوں کو خطرے کی جگہوں سے دور رکھیں اور ذمہ دار شہری ہونے کا ثبوت دیتے ہوئے انتظامی ہدایات پر عمل کریں۔