برلن:جرمنی کے دارالحکومت برلن میں ہم جنس پرستوں کی ’برلن پرائیڈ‘ (Berlin Pride) پر وین شرکا پر چڑھ دوڑی، واقعے میں کم از کم ایک شخص ہلاک اور 16 افراد زخمی ہو گئے ہیں۔
اس واقعے کے بعد یورپ کی اس سب سے بڑی پرائیڈ تقریب کو ہنگامی طور پر قبل از وقت ختم کرنا پڑا۔
برلن پولیس کے ترجمان کے مطابق، ہفتہ کی شب پیش آنے والے اس مبینہ حملے کے مشتبہ پرپیٹریٹر (ملزم) کی شناخت شہر کے ’اسلامسٹ سرکل‘ (Islamist scene) کے ایک رکن کے طور پر کی گئی ہے، تاہم تاحال اس کی گرفتاری عمل میں نہیں آ سکی ہے۔ پولیس نے بتایا کہ سفید رنگ کی ایک وین رات 10 بجے سے ذرا قبل برلن کے مرکزی ٹیرگارٹن پارک (Tiergarten park) میں گھسی، وین نے پیدل چلنے والوں کو ٹکر ماری اور پھر ایک درخت سے جا ٹکرائی۔
پولیس کے مطابق جائے وقوعہ پر گاڑی خالی ملی، جس کے بعد فرار ہونے والے ملزم یا ملزمان کی تلاش کے لیے ہیلی کاپٹرز اور مختلف جرمن ریاستوں کے افسران پر مشتمل ایک وسیع پیمانے پر سرچ آپریشن (Manhunt) جاری ہے۔ زخمیوں میں سے کئی افراد کی حالت نازک اور جان لیوا بتائی جا رہی ہے۔
واضح رہے کہ برلن میں ستمبر میں ریاستی انتخابات ہونے والے ہیں۔ اس سال پرائیڈ پریڈ کے شرکاء نے جرمنی میں کوئیر (Queer) افراد کے خلاف بڑھتی ہوئی دشمنی اور نفرت کے سدباب کے لیے ریلی نکالی تھی، جس میں 80 سے زائد فلوٹس اور 50 کے قریب گروپوں نے شرکت کی تھی۔
کرسٹوفر سٹریٹ ڈے برلن میں ہر سال منعقد کیا جاتا ہے اور انتظامیہ کے مطابق اس سال تقریباً 10 لاکھ افراد کی شرکت متوقع تھی۔ یہ ایونٹ 1969 میں نیو یارک شہر میں کرسٹوفر سٹریٹ پر واقع سٹون وال اِن میں ایل جی بی ٹی کمیونٹی کی معروف بغاوت کی یاد میں منعقد کیا جاتا ہے۔
برلن، وین ہم جنس پرستوں کی پریڈ پر چڑھا دی گئی: ایک ہلاک، 16 زخمی، مشتبہ ملزم کا تعلق ’اسلامسٹ سرکل‘ سے ہے، پولیس
