صوابی (حق نواز خان)
ٹوپی: صوبائی حکومت نے تحصیل ٹوپی میں صفائی کے نظام کو مزید مؤثر بنانے کیلئے ٹی ایم اے ٹوپی کو دو ٹریکٹر، دو شاہ زور لوڈر اور ایک ایکسکیویٹر ٹریکٹر فراہم کر دیا۔نئی مشینری کی حوالگی کے موقع پر رکن صوبائی اسمبلی حاجی رنگیز احمد نے کہا کہ صوبائی حکومت ٹوپی شہر سمیت پوری تحصیل کو صاف ستھرا رکھنے کیلئے ہر ممکن سہولیات فراہم کر رہی ہے۔ انہوں نے کہا کہ ضلع بھر کی تمام ویلیج کونسلوں میں بھی رکشہ لوڈر اور صفائی کیلئے چار، چار اہلکار تعینات کیے جا رہے ہیں، جو صفائی کے نظام میں ایک انقلابی اقدام ہے۔اس موقع پر ٹی ایم او عاکف، ریجنل میونسپل آفیسر زیشان خان اور سینیٹری انسپکٹر محمد فاضل بھی موجود تھے۔ٹی ایم او عاکف اور ریجنل میونسپل آفیسر زیشان خان نے شہریوں کو بہتر میونسپل سہولیات کی فراہمی اور نئی مشینری کی فراہمی پر ایم پی اے حاجی رنگیز احمد کی کاوشوں کو سراہتے ہوئے کہا کہ سینیٹیشن ونگ میں جدید مشینری شامل ہونے سے صفائی کے نظام میں نمایاں بہتری آئے گی اور شہریوں کو مزید بہتر خدمات فراہم کی جا سکیں گی۔سینیٹری انسپکٹر محمد فاضل نے کہا کہ ٹی ایم اے کا سینیٹری عملہ شہری حدود میں صفائی کے علاوہ خصوصی مواقع اور ہنگامی حالات میں بھی اہم کردار ادا کرتا رہا ہے۔ انہوں نے کہا کہ نئی مشینری کی شمولیت سے صفائی کے انتظامات مزید مؤثر اور تیز رفتار ہوں گے۔تقریب میں ٹی ایم اے کے افسران و اہلکاروں، معززین علاقہ اور پاکستان تحریک انصاف کے رہنماؤں و کارکنان نے بھی شرکت کی۔