نیویارک: عالمی شہرت یافتہ پاپ اسٹار ٹیلر سوئفٹ اور این ایف ایل اسٹار ٹریوس کیلسی کی شادی کی خبریں سوشل میڈیا پر طوفان مچا رہی ہیں۔ میڈیا رپورٹس کے مطابق یہ جوڑا جولائی کے پہلے ہفتے میں نیویارک کے مشہور مقام ‘میڈیسن اسکوائر گارڈن’ میں رشتہ ازدواج میں منسلک ہونے جا رہا ہے، تاہم اس جوڑے کی جانب سے تاحال کوئی باضابطہ تصدیق نہیں کی گئی ہے۔
نیویارک ٹائمز کی ایک رپورٹ کے مطابق، ٹیلر اور ٹریوس 2 جولائی کو 100 مہمانوں کے لیے ایک تقریب اور 3 جولائی کو تقریباً 1000 مہمانوں کے لیے ایک بڑی تقریب کا منصوبہ بنا رہے ہیں۔ اگرچہ ایسوسی ایٹڈ پریس (AP) نے ان تفصیلات کی آزادانہ تصدیق نہیں کی ہے، تاہم میڈیسن اسکوائر گارڈن کے ریکارڈ اور انتظامیہ کی جانب سے جاری کردہ اجازت ناموں (Permits) نے ان قیاس آرائیوں کو مزید ہوا دے دی ہے۔ 29 جون سے 4 جولائی تک اس میدان میں کسی بھی عوامی تقریب کا شیڈول نہیں ہے، جس سے ان خبروں کو تقویت ملتی ہے۔
نیویارک شہر کے مئیر زہران ممدانی نے بھی ایک پریس کانفرنس کے دوران مذاق میں اس شادی کا ذکر کرتے ہوئے کہا، "ہم جانتے ہیں کہ یہ تاریخ 4 جولائی اور امریکہ کے 250 ویں یومِ تاسیس کے ساتھ ٹیلر سوئفٹ کی شادی سے بھی مطابقت رکھتی ہے، اور ہم دنیا کو یہاں خوش آمدید کہنے کے لیے بہت پرجوش ہیں۔” تاہم مئیر نے واضح کیا کہ انہیں شادی کی دعوت نہیں ملی ہے۔
میڈیسن اسکوائر گارڈن کیوں؟
اگرچہ یہ مقام روایتی شادی کے لیے عام نہیں، لیکن یہاں نجی تقریبات منعقد کی جا سکتی ہیں۔ سب سے اہم بات اس مقام کی سیکیورٹی ہے۔ بغیر کھڑکیوں کے یہ ہال، محفوظ گیراج اور سخت پہرہ مشہور جوڑے کو میڈیا کے کیمروں اور ڈرونز سے دور ایک نجی تقریب منعقد کرنے کا بہترین موقع فراہم کر سکتا ہے۔
ایک طرف مداح (Swifties) شادی کی تیاریوں کے منتظر ہیں، تو دوسری طرف بعض ماہرین کا خیال ہے کہ یہ خبریں اصل شادی کی جگہ کو خفیہ رکھنے کے لیے محض ایک "سموک اسکرین” (دھواں) بھی ہو سکتی ہیں۔ ٹیلر سوئفٹ نے ماضی میں اپنی ایک گانے میں اشارہ دیا تھا کہ ان کی شادی ایک عوامی تماشا نہیں ہوگی۔
فی الحال، ٹیلر کے قریبی دوستوں، اداکارہ ایما اسٹون، سیلینا گومز، گیگی حدید اور ٹریوس کے ساتھی کھلاڑی پیٹرک ماہومز سمیت کئی مشہور شخصیات کی شرکت متوقع ہے۔ کیا 4 جولائی کا ہفتہ واقعی اس جوڑے کی زندگی کا سب سے بڑا دن ثابت ہوگا؟ اس کا حتمی جواب تو آنے والے چند دنوں میں ہی ملے گا۔
کیا ٹیلر سوئفٹ اور ٹریوس کیلسی میڈیسن اسکوائر گارڈن میں شادی کر رہے ہیں؟ تاریخ آگئی
