میونسپل کارپوریشن سیالکوٹ کے مالی حالات خراب بجلی کے بل کی ادائیگی نہ ہو سکی

سیالکوٹ (سلیم احمد اعوان شیخو) اس بات کا انکشاف ہوا ہے کہ میونسپل کارپوریشن سیالکوٹ کے مالی حالات بہت خستہ اور خراب ہیں۔میونسپل کارپوریشن کی جانب سے بجلی کے بل کی ادائیگی نہ ہو سکی ہے جبکہ میونسپل کارپوریشن کا خزانہ خالی پڑا ہے اور پانی کی ترسیل کے لئے نصب کی گئیں موٹریں بھی عرصہ دراز سے خراب پڑی ہیں اور شہریوں کو پانی کی مناسب فراہمی نہ ہو رہی ہے جبکہ سٹریٹ لائٹس خراب پڑی ہیں بلکہ غائب بھی ہیں اور گلیوں میں اندھیرا بھی رہتا ہے۔کیا ایڈمنسٹریٹر میونسپل کارپوریشن ذوالقرنین اعوان یہ بتانا گواراہ کریں گے کہ بجٹ کے حجم کے مطابق کتنی ریکوری ہوئی ہے اور کتنے فنڈز کس کس منصوبہ پر خرچ ہوئے ہیں۔شہریوں کو یہ تو کم از کم یہ معلوم ہو سکے کہ ان کی محنت کی کمائی کی ٹیکس کی ریکوری کی رقوم کس مد میں کہاں خرچ ہوئی ہے۔اس سلسلہ میں ایڈمنسٹریٹر میونسپل کارپوریشن ذوالقرنین اعوان نے رابطہ کرنے پر بتایا کہ میونسپل کارپوریشن پر اللّٰہ کا فضل ہے اور کارپوریشن کا خزانہ خالی نہ ہے جبکہ شہر کی بہتری اور خوبصورتی پر فنڈز خرچ کئے گئے ہیں اور لوگ کارپوریشن کے خلاف جھوٹا پروپیگنڈہ کر رہے ہیں۔چیف آفیسر میونسپل کارپوریشن زبیر وٹو نے بتایا کہ کارپوریشن کے خلاف بعض شر پسند لوگ جھوٹی افواہیں پھیلا رہے ہیں جبکہ کارپوریشن کا خزانہ خالی نہ ہے اور بجلی کی بلوں کی ادائیگی باقاعدگی سے کی جا رہی ہے بلکہ شہریوں کو پانی کی فراہمی بہت بہترین طریقہ سے جاری ہے جبکہ سٹریٹ لائٹس کا نظام بھی بہت اچھا ہے۔