شہدادپور (رپورٹ: امیر حیدر)
شہدادپور میں بھی محرم الحرام کے سلسلے میں عزاداری کے پروگرام عقیدت و احترام کے ساتھ منعقد کیے گئے۔ اس سلسلے میں مرکزی ماتمی جلوس حسینی امام بارگاہ سے برآمد ہوا، جس میں سینکڑوں عزاداروں نے شرکت کر کے حضرت امام حسینؑ اور شہدائے کربلا کی عظیم قربانیوں کو خراجِ عقیدت پیش کیا۔جلوس اپنے مقررہ راستوں سے ہوتا ہوا شہر کے مختلف چوکوں اور بازاروں سے گزرا اور لطیف پارک پہنچا، جہاں عزاداروں نے سینہ زنی، زنجیر زنی اور گرزوں کا ماتم کیا۔ "یا حسینؑ” کی صداؤں سے فضا سوگوار رہی اور شرکاء نے شہدائے کربلا سے اپنی والہانہ عقیدت کا اظہار کیا۔اس موقع پر سماجی کارکنوں، مختلف سیاسی و مذہبی تنظیموں کی جانب سے عزاداروں کے لیے سبیلوں اور دیگر سہولیات کا اہتمام کیا گیا۔ جبکہ سمس اسپتال شہدادپور اور کریمہ مجید چٹو کے تعاون سے طبی کیمپ بھی قائم کیے گئے، جہاں ڈاکٹروں اور پیرا میڈیکل عملے نے عزاداروں کو مفت طبی امداد اور ادویات فراہم کیں۔ مقررین اور ذاکرین نے اپنے خطابات میں کہا کہ حضرت امام حسینؑ اور ان کے جانثار ساتھیوں نے اسلام کی بقا، حق، انصاف اور انسانیت کی سربلندی کے لیے میدانِ کربلا میں لازوال قربانیاں پیش کیں۔ انہوں نے کہا کہ امام حسینؑ نے ظلم، جبر اور باطل کے سامنے سر جھکانے کے بجائے شہادت کو ترجیح دے کر رہتی دنیا تک حق و صداقت کا درس دیا۔جلوس کی سیکیورٹی کے لیے پولیس اور قانون نافذ کرنے والے اداروں کی جانب سے سخت انتظامات کیے گئے تھے۔ عزاداری کے تمام پروگرام پرامن ماحول میں اختتام پذیر ہوئے، جبکہ شرکاء نے حضرت امام حسینؑ کی عظیم قربانیوں کو یاد کرتے ہوئے ملک کے امن، ترقی اور خوشحالی کے لیے خصوصی دعائیں بھی کیں۔