ہنگورجا: رپورٹ فیاض محسن سولنگی
ہنگورجا تھانے کی حدود میں سچل پیٹرول پمپ کے قریب گندم کے گودام کے پاس نامعلوم مسلح افراد نے دن دیہاڑے اسلحے کے زور پر گاؤں نہال خان سولنگی کے رہائشی استاد سعید احمد سولنگی سے 2025 ماڈل سی ڈی موٹر سائیکل، 2 ہزار روپے نقد رقم اور ویوو موبائل فون چھین لیا اور فرار ہو گئے۔
واقعے کے خلاف گاؤں نہال خان سولنگی کے مکینوں اور سولنگی برادری کے افراد نے بدامنی اور ڈکیتی کے خلاف لال بخش اسٹاپ پر قومی شاہراہ کو مکمل طور پر بند کر کے شدید نعرے بازی کی۔
قومی شاہراہ تقریباً دو گھنٹے تک بند رہنے کے باعث سڑک کے دونوں اطراف گاڑیوں کی لمبی قطاریں لگ گئیں اور ٹریفک بری طرح متاثر ہوئی۔
بعد ازاں ایس ایچ او ہنگورجا اقبال نون کی جانب سے یقین دہانی کرائی گئی کہ ایک ہفتے کے اندر چھینی گئی موٹر سائیکل اور دیگر سامان برآمد کرنے کی کوشش کی جائے گی، جس کے بعد مظاہرین نے احتجاج ختم کر دیا، قومی شاہراہ کو ٹریفک کے لیے کھول دیا گیا اور آمدورفت معمول کے مطابق بحال ہو گئی۔