اسلام آباد (عاشرعلی سے)
ڈی آئی جی اسلام آباد محمد جواد طارق کی زیرِ صدارت محرم الحرام سکیورٹی کے حوالے سے اعلیٰ سطحی اجلاس۔
محرم الحرام کے دوران فول پروف سکیورٹی یقینی بنانے کے لیے تمام افسران کو خصوصی ٹاسک سونپ دیے گئے۔مجالس اور جلوسوں کے شرکاءکو بھرپور تحفظ فراہم کرنے کے لئے جامع سکیورٹی پلان پر عملدرآمد کی ہدایت۔
تفصیلات کے مطابق ڈپٹی انسپکٹر جنرل آف پولیس اسلام آباد، محمد جواد طارق کی زیرِ صدارت محرم الحرام کے دوران سکیورٹی انتظامات کا جائزہ لینے کے لیے ایک اعلیٰ سطحی اجلاس منعقد ہوا۔ اجلاس میں ایس ایس پی آپریشنز اسلام آباد قاضی علی رضا، ایس ایس پی سکیورٹی آپریشنز سلمان ظفر، تمام زونل ایس پیز، ایس ڈی پی اوز، ایس ایچ اوز اور متعلقہ افسران نے شرکت کی۔اس موقع پر محرم الحرام کے دوران امن و امان کی صورتحال، سکیورٹی انتظامات، ٹریفک مینجمنٹ اور مجالس و جلوسوں کے تحفظ کے حوالے سے تفصیلی غور و خوض کیا گیا۔ڈی آئی جی اسلام آباد محمد جواد طارق نے تمام افسران کو ہدایت کی کہ محرم الحرام کے دوران فول پروف سکیورٹی انتظامات کو ہر صورت یقینی بنایا جائے اور مجالس و جلوسوں کے شرکاء کو بھرپور تحفظ فراہم کرنے کے لیے جامع سکیورٹی پلان پر موثر انداز میں عملدرآمد کیا جائے۔ انہوں نے ہدایت کی کہ حساس مقامات پر پٹرولنگ میں اضافہ کیا جائے جبکہ سرچ اینڈ کومنگ آپریشنز کو مزید موثر بنایا جائے۔تمام افسران امام بارگاہوں کے منتظمین، امن کمیٹیوں اور مقامی عمائدین کے ساتھ قریبی رابطہ رکھیں تاکہ کسی بھی ممکنہ صورتحال سے بروقت نمٹا جا سکے۔ڈی آئی جی اسلام آباد نے جلوسوں کے روٹس کا تفصیلی جائزہ لینے کی ہدایت کرتے ہوئے کہا کہ راستوں میں موجود جھاڑیوں، خود رو پودوں اور دیگر رکاوٹوں کی صفائی کو یقینی بنایا جائے۔ انہوں نے مزید ہدایت کی کہ شہر کے داخلی و خارجی راستوں، امام بارگاہوں، عبادتگاہوں اور دیگر حساس مقامات پر موثر چیکنگ کا نظام نافذ کیا جائے۔ شہر بھر میں سرویلنس، مانیٹرنگ اور سکیورٹی نگرانی کے نظام کو مزید موثر بنایا جائے، جبکہ مجالس اور جلوسوں میں شریک عزاداروں کی میٹل ڈیٹیکٹرز اور دیگر جدید آلات کے ذریعے مکمل چیکنگ کو یقینی بنایا جائے۔انہوں نے کہا کہ محرم الحرام کے دوران ٹریفک کی روانی برقرار رکھنے کے لیے ٹریفک پولیس چوبیس گھنٹے متحرک رہے گی اور شہریوں کی سہولت کے لیے خصوصی ٹریفک پلان پر عملدرآمد کیا جائے گا۔ڈی آئی جی نے اس عزم کا اظہار کیا کہ شہریوں کی جان و مال کا تحفظ، امن و امان کا قیام اور محرم الحرام کے دوران پرامن ماحول کو یقینی بنانا اسلام آباد پولیس کی اولین ترجیح ہے، جس کے لیے تمام دستیاب وسائل بروئے کار لائے جائیں گے۔