امریکہ کی ریاست آئیووا کے مَسکیٹائن(Muscatine) شہر میں اندھا دھند فائرنگ فائرنگ کے نتیجے میں ایک ہی خاندان کے چھ افراد ہلاک ہوگئے ۔ مشتبہ حملہ آور بھی اس حملے میں مارا گیا ہے ۔ مختلف مقامات پر فائرنگ کی اطلاعات ملنے کے بعد علاقے میں خوف و ہراس پھیل گیا۔ تاہم بعد میں معلوم ہوا کہ یہ معاملہ ایک گھریلو تنازع سے جڑا ہوا تھا۔
پولیس کے مطابق مقامی وقت کے مطابق پیر کے روز دوپہر تقریباً 12 بج کر 12 منٹ پر پارک ایونیو میں واقع ایک گھر سے فائرنگ کی اطلاع موصول ہوئی، جس کے بعد پولیس اور ایمرجنسی ٹیمیں موقع پر پہنچ گئیں۔انہوں نے دیکھا کہ گھر کے اندر چار افراد کو گولیاں لگی تھیں اور وہ موقع پر ہی ہلاک ہو چکے تھے۔
مشتبہ حملہ آور کی شناخت 52 سالہ ریان ولس میک فارلینڈ کے طور پر ہوئی۔ واردات انجام دینے کے بعد وہ موقع سے فرار ہو گیا تھا۔کچھ ہی دیر بعد پولیس نے اسے ریور فرنٹ ٹریل کے قریب ایک پیدل پل کے نزدیک ڈھونڈ نکالا۔ وہاں پولیس سے بات چیت کے دوران میک فارلینڈ نے خود کو گولی مار لی۔ پولیس کی کوششوں کے باوجود اس کی جان نہ بچائی جا سکی۔
تحقیقات آگے بڑھنے پر پولیس کو مزید دو لاشیں ملیں، جن میں سے ایک 150 مل اسٹریٹ پر واقع ایک گھر سے اور دوسری 808 گرینڈ ویو ایونیو میں واقع ایک دکان سے برآمد ہوئی۔ دونوں افراد گولی لگنے سے ہلاک ہوئے تھے۔