کوٹلی ستیاں کے جنگل کی آگ کہوٹہ تک پہنچ گئی، مالا کنڈ اور مظفر آباد میں بھی قیمتی درخت ،جنگلی حیات جل کر راکھ

مری + پشاور:کوٹلی ستیاں، مالاکنڈ اور مظفرآباد کے پہاڑی سلسلوں اور جنگلات میں آگ بھڑک اٹھی۔
مری کے علاقے کوٹلی ستیاں کے جنگلات گزشتہ 24 گھنٹوں سے شدید آگ کی لپیٹ میں ہیں۔
اطلاعات کے مطابق آگ کہوٹہ کے جنگلات تک بھی پہنچ گئی ہے جبکہ آگ کے شعلے اور دھواں میلوں دور سے دیکھا جا سکتا ہے۔
آگ کے باعث جنگلی حیات، جنگلات اور پھل دار درخت جل کر راکھ ہو گئے ہیں، باھنگل، لہتراڑ، بھتیاں گزارہ اور کورینہ کے جنگلات بھی آگ کی لپیٹ میں آ چکے ہیں۔مقامی افراد اور ریسکیو اہلکار آگ بجھانے میں مصروف ہیں تاہم تاحال آگ کی شدت کم نہیں ہو سکی۔
دوسری طرف مالاکنڈ کی تحصیل بٹ خیلہ کے سنگینہ پہاڑ میں لگی آگ نے شدید اختیار کر لی ہے، جس کے بعد مقامی مساجد سے شہریوں کو آگ بجھانے میں مدد کے لیے نکلنے کے اعلانات کیے جا رہے ہیں۔
پولیس حکام کے مطابق مالاکنڈ کی تینوں تحصیلوں کے مختلف پہاڑی سلسلےاس وقت آگ کی لپیٹ میں ہیں۔ تحصیل بٹ خیلہ کے سنگینہ پہاڑ، درگئی کے جبن پہاڑ اور تحصیل تھانہ کے بایزی آلہ ڈھنڈ ڈھیری اور زرکنڈی تنگے کے پہاڑوں میں لگی آگ نے قیمتی درختوں کو جھلسا کر رکھ دیا ہے۔دوسری جانب، مظفرآباد کے نواحی پہاڑوں کے جنگلات بھی آگ کی زد میں ہیں۔ کنزرویٹر فاریسٹ میر نصیر کا کہنا ہے کہ شدید گرمی کے باعث چیڑھ کے جنگلات میں قدرتی طور پر آگ لگنے کے واقعات پیش آرہےہیں، محکمہ جنگلات کے پاس ضروری ساز و سامان کی شدید کمی ہے، روایتی طریقوں سے آگ پر قابو پانے کی کوشش کی جا رہی ہے۔