پاک چین سفارتی تعلقات کے 75 سال: مریم نواز شریف کا چینی قیادت اور عوام کو مبارکباد

لاہور : وزیراعلیٰ پنجاب مریم نواز شریف نے پاکستان اور چین کے درمیان سفارتی تعلقات کے قیام کی 75 ویں سالگرہ کے تاریخی موقع پر چینی صدر شی جن پنگ، کمیونسٹ پارٹی آف چائنا اور چین کے عوام کو دلی مبارکباد پیش کی ہے۔
وزیراعلیٰ پنجاب نے اپنے خصوصی پیغام میں کہا کہ پاکستان اور چین کی لازوال دوستی ہمالیہ سے بلند، سمندروں سے گہری اور فولاد سے زیادہ مضبوط ہے۔ انہوں نے اس تعلق کو باہمی اعتماد، احترام اور مشترکہ ترقی کی ایک شاندار مثال قرار دیا۔
مریم نواز شریف نے اس عزم کا اعادہ کیا کہ پاکستان چین کے ساتھ اپنی تزویراتی شراکت داری کو مزید مستحکم کرنے کے لیے پرعزم ہے۔ انہوں نے کہا کہ چین نے ہر مشکل گھڑی میں پاکستان کے ساتھ کھڑے ہو کر حقِ دوستی ادا کیا ہے، اور دونوں ممالک کا امن، خوشحالی اور علاقائی استحکام کے لیے مؤقف ہمیشہ یکساں رہا ہے۔
سی پیک (CPEC) کے حوالے سے اپنے خیالات کا اظہار کرتے ہوئے وزیراعلیٰ نے کہا کہ پاک چین اقتصادی راہداری دونوں ممالک کے عوام کی خوشحالی اور روشن مستقبل کی نوید ہے۔ یہ منصوبہ نہ صرف معاشی تعاون کا منہ بولتا ثبوت ہے بلکہ پائیدار ترقی کے نئے دروازے بھی کھول رہا ہے۔
اپنے پیغام کے آخر میں مریم نواز شریف نے دعا کی کہ 75 سال پر محیط یہ دوستی نہ صرف موجودہ دور میں بلکہ آنے والی نسلوں تک اسی طرح قائم و دائم رہے گی۔ انہوں نے کہا کہ اس تاریخ ساز سنگ میل پر ہم اپنی شراکت داری کو نئی بلندیوں تک لے جانے کے عزم کو دہراتے ہیں۔ "پاک چین دوستی زندہ باد!”