پیٹرولیم قیمتوں، مہنگائی اور ایف بی آر پالیسیوں کے خلاف نواب شاہ میں شہری تاجر اتحاد کا احتجاجی مظاہرہ

نواب شاہ ( رپورٹ نفیس آرائیں) نواب شاہ شہری تاجر اتحاد اور آل پاکستان انجمن تاجران نواب شاہ کی جانب سے الگ الگ پیٹرولیم مصنوعات کی بڑھتی ہوئی قیمتوں، مہنگائی کے طوفان اور ایف بی آر کے مبینہ ناروا رویوں کے خلاف احتجاجی مظاہرے کیے گئے۔ مظاہرین نے شدید نعرے بازی کرتے ہوئے اپنے مطالبات پیش کیے۔احتجاجی مظاہرے کی قیادت ایک جانب دیدار حسین رند، آغا جان محمد پٹھان ایڈووکیٹ اور ضیاء الحق نے کی، جبکہ آل پاکستان انجمن تاجران کے مظاہرے کی قیادت کامران قیوم قریشی اور شاہد کھوکھر نے کی۔ اس موقع پر تاجروں، دکانداروں اور شہریوں کی بڑی تعداد نے شرکت کی۔مظاہرین نے ہاتھوں میں پلے کارڈز اور بینرز اٹھا رکھے تھے، جن پر مہنگائی، اضافی ٹیکسوں اور ایف بی آر پالیسیوں کے خلاف نعرے درج تھے۔اس موقع پر خطاب کرتے ہوئے تاجر رہنماؤں نے کہا کہ موجودہ مہنگائی نے عوام اور تاجروں کی کمر توڑ کر رکھ دی ہے۔ پیٹرولیم مصنوعات کی قیمتوں میں مسلسل اضافے سے کاروبار شدید متاثر ہو رہے ہیں، جبکہ عام آدمی دو وقت کی روٹی کے لیے پریشان ہے۔ انہوں نے حکومت سے مطالبہ کیا کہ فوری طور پر پیٹرولیم مصنوعات کی قیمتوں میں کمی کی جائے اور تاجروں کو ریلیف فراہم کیا جائے۔