سکھر (رپورٹ: عبد الرحمان راجپوت)
عیدالاضحی کے موقع پر سکھر میں صفائی ستھرائی کے خصوصی انتظامات، میونسپل کارپوریشن اور ریلوے انتظامیہ متحرک۔عیدالاضحی کے مقدس موقع پر شہر سکھر کو صاف ستھرا رکھنے اور شہریوں کو بہترین سہولیات فراہم کرنے کے لیے میونسپل کارپوریشن سکھر نے خصوصی صفائی مہم کا آغاز کر دیا ہے۔ اسی سلسلے میں میونسپل کارپوریشن سکھر کے ترجمان عامر مغل نے ڈویژنل سپرنٹنڈنٹ (ڈی ایس) ریلوے سکھر فرمان غنی سے ان کے دفتر میں اہم ملاقات کی، جس میں عید کے دنوں میں صفائی ستھرائی کے مثر انتظامات، بالخصوص ریلوے کالونیوں میں آلائشیں بروقت اٹھانے اور صفائی کے نظام کو بہتر بنانے پر تفصیلی تبادلہ خیال کیا گیا۔ملاقات کے دوران دونوں اداروں کے درمیان باہمی تعاون کو مزید مضبوط بنانے پر اتفاق کیا گیا تاکہ عیدالاضحی کے دوران شہر کے مختلف علاقوں سمیت ریلوے حدود میں بھی صفائی کا اعلی معیار برقرار رکھا جا سکے۔ ترجمان میونسپل کارپوریشن عامر مغل نے ڈی ایس ریلوے کو کارپوریشن کے خصوصی صفائی پلان، عملے کی تعیناتی، آلائشیں اٹھانے کے لیے گاڑیوں کی دستیابی اور ہنگامی ٹیموں کے قیام سے متعلق آگاہ کیا۔عامر مغل نے کہا کہ میونسپل کارپوریشن کی اولین ترجیح شہریوں کو صاف، صحت مند اور خوشگوار ماحول فراہم کرنا ہے۔