معرکہ حق ، قومی تاریخ کا قابل فخرباب، اپنی افواج پاکستان پر فخر ہے، عظمیٰ بخاری

لاہور:وزیر اطلاعات و ثقافت پنجاب عظمیٰ بخاری نے کہا ہے کہ آج پوری قوم ’’معرکۂ حق ‘‘ کی پہلی سالگرہ منا رہی ہے، جو قومی تاریخ کا ایک اہم اور قابلِ فخر باب ہے۔ 9 اور 10 مئی کو بھارتی جارحیت مسلسل جاری رہی، جس کا پاک فوج نے نہایت حکمت عملی، جرأت اور پیشہ ورانہ مہارت کے ساتھ بھرپور جواب دیا۔
عظمیٰ بخاری نے کہا کہ پاک فوج نے جس جذبے، ذہانت اور عزم کے ساتھ دشمن کو جواب دیا، اس کا اعتراف دنیا بھر میں کیا جا رہا ہے اور یہ ایک مثالی مثال بن چکا ہے۔ ہر پاکستانی اس بات پر فخر محسوس کرتا ہے کہ اس کے پاس دنیا کی بہترین اور مضبوط فوج موجود ہے۔ اس نازک صورتحال کے باوجود پاکستان کے عوام کے چہروں پر خوف یا پریشانی کے آثار دکھائی نہیں دیئے کیونکہ قوم کو اپنے محافظوں پر مکمل اعتماد تھا۔
انہوں نے کہا کہ ہمارے بہادر سپاہی پاکستان کی حفاظت کرنا جانتے ہیں اور انہوں نے ایک بار پھر اپنے عمل سے یہ ثابت بھی کر دکھایا۔
عظمیٰ بخاری نے اپنے پیغام کے اختتام پر کہا کہ پاکستان ہمیشہ قائم و دائم رہے گا، پاکستان زندہ باد، اور ہم سب کو اپنی افواج اور قومی سلامتی کے اداروں پر فخر ہے۔