اسلام آباد (محمد شبیر رپورٹرسے)
وفاقی دارالحکومت میں منشیات کے بڑھتے ہوئے رجحان کے خلاف تھانہ گولڑہ پولیس نے اہم اور بروقت کارروائی کرتے ہوئے ایک غیر ملکی منشیات فروش کو گرفتار کر لیا۔ کارروائی خفیہ اطلاع پر کی گئی، جس کی قیادت سب انسپکٹر (ایس آئی) آصف نے اپنی ٹیم کے ہمراہ کی۔پولیس ذرائع کے مطابق اطلاع ملی تھی کہ گولڑہ کے نواحی علاقے میں ایک غیر ملکی شہری منشیات کی سپلائی میں ملوث ہے، جو مقامی نیٹ ورک کے ذریعے شہر کے مختلف علاقوں میں منشیات فراہم کر رہا ہے۔ اطلاع کو مصدقہ بنانے کے بعد ایس آئی آصف نے فوری حکمت عملی ترتیب دی اور نفری کے ہمراہ چھاپہ مار کارروائی کی۔کارروائی کے دوران ملزم کو گرفتار کر کے اس کے قبضے سے قابلِ ذکر مقدار میں منشیات برآمد کر لی گئی۔ پولیس نے ملزم کے خلاف متعلقہ دفعات کے تحت مقدمہ درج کر کے مزید تفتیش کا آغاز کر دیا ہے، جبکہ اس کے دیگر ساتھیوں اور ممکنہ سہولت کاروں کی تلاش بھی جاری ہے۔ذرائع کا کہنا ہے کہ ابتدائی تفتیش میں ملزم نے کچھ اہم انکشافات کیے ہیں، جن کی روشنی میں پولیس مزید گرفتاریاں بھی متوقع ہیں۔
اس بات کا بھی جائزہ لیا جا رہا ہے کہ آیا ملزم کسی بین الاقوامی منشیات نیٹ ورک کا حصہ ہے یا مقامی سطح پر ہی سرگرم تھا۔ایس آئی آصف کی جانب سے کی جانے والی اس کامیاب کارروائی کو پولیس حلقوں اور شہریوں کی جانب سے سراہا جا رہا ہے۔