متحدہ عرب امارات نے3 ایرانی میزائل مار گرائے، فجیرہ بندرگاہ پر ڈرون حملہ، آتشزدگی، تین انڈین شہری زخمی

ابو ظہبی :متحدہ عرب امارات کی وزارتِ دفاع کا کہنا ہے کہ اس کے فضائی دفاعی نظام نے ایران سے داغے گئے تین میزائل فضا میں ہی مار گرائے ہیں جبکہ چوتھا میزائل سمندر میں گرا ہے۔
سوشل میڈیا پر جاری ایک پوسٹ میں کہا گیا ہے کہ ملک کے مختلف حصوں میں سنی گئی دھماکوں کی آوازیں ان میزائلوں کو مار گرانے کی تھیں۔
اس سے قبل متحدہ عرب امارات کی نیشنل ایمرجنسی کرائسز اینڈ ڈیزاسٹر اتھارٹی نے میزائل حملے کا الرٹ جاری کرتے ہوئے لوگوں کو محفوظ مقامات پر جانے کا مشورہ دیا تھا۔
متحدہ عرب امارات کے حکام کا کہنا ہے کہ ایران کی جانب سے ڈرون حملے کے نتیجے میں ملک میں تیل کی برآمدات کے لیے استعمال ہونے والی فجیرہ بندرگاہ پر آتشزدگی کا واقعہ پیش آیا ہے۔
فجیرہ گورنمنٹ میڈیا آفس کی جانب سے جاری ایک بیان میں بتایا گیا ہے کہ فجیرہ پیٹرولیم انڈسٹریز زون پر ہونے والے ایرانی ڈرون حملے کے نتیجے میں تین انڈین شہری زخمی ہوئے ہیں۔
قطر نے متحدہ عرب امارات کے فجیرہ پیٹرولیم انڈسٹریز زون میں ہونے والے حملے کی مذمت کی ہے۔
قطری وزارت خارجہ کی جانب سے جاری کیے گئے بیان میں کہا گیا ہے کہ یہ حملہ بین الاقوامی قانون اور میری ٹائم نیوی گیشن کی آزادی کے اُصول کی کھلی خلاف ورزی ہے۔