”ایک اورمعاشی 9 مئی‘ کی کوشش ناکام ہوگی: عظمیٰ بخاری کا قاسم خان کے بیان پر ردعمل“

لاہور : پنجاب کی صوبائی وزیر اطلاعات عظمیٰ بخاری نے عمران خان کے صاحبزادے قاسم خان کے حالیہ عالمی بیان پر سخت ردعمل دیتے ہوئے اسے پاکستان کے خلاف ‘معاشی 9 مئی’ قرار دے دیا ہے۔
انہوں نے واضح کیا کہ مئی 2025 کے بعد پاکستان عالمی سطح پر ایک بڑی طاقت بن کر ابھرا ہے، جسے روکنے کے لیے اب عمران خان کے بیٹوں کو میدان میں اتارا جا رہا ہے۔
عظمیٰ بخاری نے پریس کانفرنس کرتے ہوئے کہا کہ حکومت کی بہتر پالیسیوں کی بدولت پاکستان کو 2027 تک جی ایس پی پلس (GSP+) کا اسٹیٹس ملا ہے، لیکن افسوسناک بات یہ ہے کہ اب اس اسٹیٹس کو ختم کرانے کے لیے باقاعدہ تقریبات منعقد کی جا رہی ہیں۔ انہوں نے الزام لگایا کہ "قاسم خان اور بانی پی ٹی آئی کے کزن ڈاکٹر عثمان نے عالمی سطح پر پاکستان کا معاشی نقصان کرنے کی کوشش کی۔ یہ دانستہ طور پر کیا گیا ایک ‘معاشی 9 مئی’ ہے جس کا ایجنڈا بھارت اور اسرائیل سے ملتا جلتا ہے۔”
قاسم خان کے انسانی حقوق کی خلاف ورزی کے دعووں پر تبصرہ کرتے ہوئے صوبائی وزیر نے کہا کہ بانی پی ٹی آئی کو جیل میں چیا سیڈز، بھنا ہوا گوشت اور تمام تر شاہانہ سہولیات میسر ہیں۔
: عظمیٰ بخاری نے قاسم خان کو مخاطب کرتے ہوئے کہا کہ وہ اپنے والد کا دورِ اقتدار یاد کریں جب انہوں نے سیاسی مخالفین کو چن چن کر جیلوں میں ڈالا۔
انہوں نے واضح کیا کہ بانی پی ٹی آئی کسی سیاسی انتقام کی وجہ سے نہیں بلکہ توشہ خانہ اور خانہ کعبہ والی گھڑی کی چوری کی وجہ سے جیل میں ہیں۔
عظمیٰ بخاری کا کہنا تھا کہ پہلے بانی پی ٹی آئی کی بہنیں ‘فساد’ کے لیے استعمال ہوئیں اور اب بیٹوں کو بھی اس ‘فتنے’ کا حصہ بنا لیا گیا ہے۔ انہوں نے سوال اٹھایا کہ جب پاکستانی نوجوان 9 مئی کے واقعات پر پیشیاں بھگت رہے تھے، تب عمران خان کے بچے اپنی ماں کے ساتھ کلبوں میں جا رہے تھے۔ انہوں نے مزید کہا کہ قاسم خان کے وفد میں کالعدم تنظیموں کے لوگ بھی شامل تھے، جو ریاست کے خلاف سازش کا ثبوت ہے۔
وزیر اطلاعات نے جے شنکر (بھارتی وزیر خارجہ) کے حالیہ بیانات کو ان کی مایوسی قرار دیا۔ انہوں نے کہا”جے شنکر اب گالیوں پر اتر آئے ہیں کیونکہ انہیں نظر آ رہا ہے کہ پاکستان فیلڈ مارشل اور وزیر خارجہ کی کوششوں سے عالمی اسٹیج پر دوبارہ نمایاں ہو رہا ہے۔ مودی سرکار سے اب بھارت کے اندر سوال ہو رہے ہیں۔”
پنجاب حکومت کے اقدامات کا ذکر کرتے ہوئے انہوں نے بتایا کہ صوبائی حکومت سائبر کرائم سے متعلق سخت قوانین پر کام کر رہی ہے۔ انہوں نے دو ٹوک الفاظ میں کہا کہ ‘اظہارِ رائے’ کے نام پر لوگوں کی پگڑیاں اچھالنا اور ریاست کے خلاف گروپ بنانا کسی صورت برداشت نہیں کیا جائے گا۔