اسلام آباد: پاکستان میں عید الفطر کے چاند کے حوالے سے تمام تر قیاس آرائیاں دم توڑ گئیں۔ سیکرٹری جنرل رویتِ ہلال نے سائنسی اعداد و شمار کی روشنی میں واضح کر دیا ہے کہ رواں سال رمضان المبارک 30 روزوں پر مشتمل ہونے کا قوی امکان ہے اور قوم عید الفطر ہفتہ 21 مارچ 2026ء کو منائے گی۔
چاند نظر کیوں نہیں آئے گا؟
سیکرٹری جنرل رویتِ ہلال کے مطابق جمعرات 19 مارچ (29 رمضان) کی شام چاند کی رویت ممکن نہیں ہوگی۔ اس کی بڑی وجوہات درج ذیل ہیں:
چاند کی پیدائش: نیا چاند جمعرات 19 مارچ 2026ء کو صبح 6 بج کر 23 منٹ پر پیدا ہوگا۔
عمر کی کمی: 29 رمضان کی شام غروبِ آفتاب کے وقت چاند کی عمر پاکستان کے تمام علاقوں میں 13 گھنٹوں سے بھی کم ہوگی، جبکہ انسانی آنکھ سے دیکھنے کے لیے عمر کم از کم 19 گھنٹے ہونا ضروری ہے۔
وقت کا فرق: غروبِ شمس اور غروبِ قمر کے درمیان فرق کراچی میں 26 منٹ اور پشاور میں 30 منٹ ہوگا، جبکہ شرعی رویت کے لیے یہ دورانیہ کم از کم 40 منٹ ہونا لازمی ہے۔
عید کب ہوگی؟
سیکرٹری جنرل نے دو ٹوک اعلان کیا ہے کہ شوال المکرم 1447ھ کا آغاز ہفتہ 21 مارچ 2026ء سے ہوگا، جس کا مطلب ہے کہ پاکستان میں عید الفطر 30 روزے مکمل ہونے کے بعد ہفتے کے روز منائی جائے گی۔
29 روزے یا 30؟ رویتِ ہلال کمیٹی نے عید الفطر 2026ء کی تاریخ کا پتا دے دیا!
