تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
سی سی پی او لاہور بلال صدیق کمیانہ نے سنگین جرائم کی بروقت اطلاع نہ دینے کو سنگین انتظامی ناکامی قرار دیتے ہوئے آپریشن ونگ کے چار ڈویژنز کے ایس پیز کے خلاف فوری تادیبی اقدام اٹھایا اور اظہارِ ناپسندیدگی کے مراسلے جاری کرنے کا حکم دے دیا۔ ذرائع کے مطابق حالیہ کرائم میٹنگ میں سی سی پی او لاہور نے کارکردگی کا سختی سے جائزہ لیا اور ناقص کارکردگی پر افسران کو دو ٹوک انداز میں آڑے ہاتھوں لیا۔ اس دوران آپریشن ونگ کے چار ایس پیز سے اہم جرائم کی بروقت رپورٹنگ میں تاخیر کی وجوہات طلب کی گئیں، تاہم افسران واضح اور قابلِ قبول مؤقف پیش کرنے میں ناکام رہے۔ ایک افسر کی جانب سے مبہم اور غیر ذمہ دارانہ جواب پر سی سی پی او نے فوری برہمی کا اظہار کرتے ہوئے سخت سرزنش کی، جس سے میٹنگ کا ماحول خاصا سنجیدہ ہو گیا۔
سی سی پی او نے واضح کیا کہ سنگین نوعیت کے جرائم کی بروقت اطلاع میں کوتاہی کسی صورت برداشت نہیں کی جائے گی اور یہ عمل نہ صرف پیشہ ورانہ غفلت بلکہ کمانڈ اینڈ کنٹرول سسٹم کی سنگین خلاف ورزی کے زمرے میں آتا ہے۔ انہوں نے خبردار کیا کہ ایسی غفلت ادارے کی ساکھ کو متاثر کرتی ہے اور عوامی اعتماد کو مجروح کرتی ہے۔ ہدایت جاری کرتے ہوئے کہا گیا کہ آئندہ ہر سنگین واقعہ کی فوری، مستند اور مکمل رپورٹنگ کو یقینی بنایا جائے، بصورت دیگر متعلقہ افسران کے خلاف مزید سخت محکمانہ کارروائی عمل میں لائی جائے گی۔ ذرائع کے مطابق اس میٹنگ میں وہ افسران بھی دباؤ میں نظر آئے جو خود کو بااثر اور فیصلہ کن سمجھتے تھے، تاہم کارکردگی کے سوال پر ان کی پیشہ ورانہ تیاری اور فیصلہ سازی کی صلاحیت بھی کمزور دکھائی دی۔