لاہور:(ملک ظہیر) انسپکٹر جنرل پولیس پنجاب عبدالکریم نے کہا ہے کہ وزیراعلیٰ پنجاب مریم نواز شریف کے "محفوظ پنجاب” ویژن کے تحت منشیات فروشوں اور سنگین جرائم میں ملوث عناصر کے خلاف گھیرا مزید تنگ کیا جائے گا۔ انہوں نے کرائم کنٹرول ڈیپارٹمنٹ (CCD) کی کارکردگی کو سراہتے ہوئے اسے جدید ٹیکنالوجی اور وسائل سے مزید لیس کرنے کا حکم دیا ہے۔
آئی جی پنجاب کی زیر صدارت منعقدہ تعارفی اجلاس میں ایڈیشنل آئی جی سی سی ڈی سہیل ظفر چٹھہ نے ادارے کے اغراض و مقاصد، اہداف اور درپیش چیلنجز پر تفصیلی بریفنگ دی۔
بریفنگ میں بتایا گیا کہ سی سی ڈی کو کریمینلز ڈیٹا بیس، جدید ترین سرویلنس سسٹم، لوکیٹرز اور آئی ٹی ٹیکنالوجی کی مکمل سپورٹ حاصل ہے۔
ایڈیشنل آئی جی سہیل ظفر چٹھہ نے دعویٰ کیا کہ سی سی ڈی کے قیام کے بعد صوبے میں ڈکیتی، راہزنی، گاڑی اور موٹر سائیکل چھیننے کی وارداتوں میں واضح کمی ریکارڈ کی گئی ہے۔
انتظامی و لاجسٹک امور کا جائزہ
ترجمان پنجاب پولیس کے مطابق اجلاس میں درج ذیل امور پر غور کیا گیا:
انفراسٹرکچر: ادارے کی عمارتوں اور نیٹ ورک کو بہتر بنانا۔
ہیومن ریسورس: تربیت یافتہ اہلکاروں کی تعیناتی اور افرادی قوت میں اضافہ۔
لاجسٹکس: فیلڈ آپریشنز کے لیے گاڑیوں اور دیگر ضروری سامان کی فراہمی۔
آئی جی پنجاب عبدالکریم نے ہدایت کی کہ سی سی ڈی ضلعی پولیس کے ساتھ مل کر سنگین جرائم کے خاتمے کے لیے مشترکہ آپریشنز کو مزید موثر بنائے۔ انہوں نے یقین دہانی کرائی کہ اہداف کے حصول کے لیے محکمہ پولیس سی سی ڈی کو ہر ممکن مالی و تکنیکی وسائل فراہم کرے گا۔
اجلاس میں ڈی آئی جی سی سی ڈی وقاص الحسن، ایس ایس پیز، ریجنل آفیسرز (ROs) اور ڈسٹرکٹ آفیسرز (DOs) سمیت دیگر سینئر پولیس افسران نے شرکت کی۔
