لاہور:پاکستانی پنجابی فلموں کے نامور اداکار سلطان راہی کی 30 ویں برسی9 جنوری کو منائی گئی۔
سلطان راہی 80 کے عشرے میں پنجابی فلموں کے معروف ہیرو رہے ہیں۔ انہوں نے 15برس تک فلمی دنیا پر راج کیا اور700 سے زائد فلموں میں اداکاری کے جوہر دیکھا کر عالمی ریکارڈ قائم کیاہے۔ 500 فلموں میں انہوں نے بطور ہیرو کردار ادا کیا ۔ انہوں نے 1971 میں اپنے فلمی کیریئر کا آغاز کیا ،پنجابی فلم بشیرا کی کامیابی نے انہیں سپر سٹار بنا دیا۔
یاد رہے کہ سلطان راہی اور مصطفی قریشی کی جوڑی فلم کی کامیابی کی ضمانت سمجھی جاتی تھی۔ بلاک بسٹرفلم مولا جٹ نے کامیابی کے ریکارڈ قائم کیے، دیگر کامیاب فلموں میں بابل،سدھا رستہ،شریف بدمعاش، سالا صاحب، چن وریام، اتھرا پتر،پتر جگے دا، ملے گا ظلم دا بدلہ، وحشی جٹ،شیر خان،شعلے،آخری جنگ، جرنیل سنگھ، دو بیگھے زمین، شیراں دے پتر اور دیگر قابل ذکر شامل ہیں۔ سلطان راہی کا نام گینز بک آف ورلڈ ریکارڈ میں موجود ہے۔سلطان راہی کو ان کی فنی صلاحیتوں کے پیش نظر 150سے زائد فلمی ایوارڈز سے نوازا جا چکا ہے۔ سلطان راہی نے اپنے وقت کی مقبول اداکارائوں جن میں اداکارہ آسیہ،انجمن،صائمہ،گوری،نیلی، بابرہ شریف شامل ہیں اپنے فن کا مظاہرہ کیا۔ سلطان راہی 9جنوری 1996 کو نامعلوم افراد کی فائرنگ سے اس دنیا فانی سے کوچ کرگئے۔