کیلے فورنیا :امریکی ٹیک کمپنی مائیکروسافٹ نے بھارت میں اپنی اب تک کی سب سے بڑی ایشیائی سرمایہ کاری کا اعلان کیا ہے۔ مائیکرو سافٹ کے سی ای او ستیہ نڈیلا نے بھارتی وزیر اعظم نریندر مودی سے ملاقات کے بعد اعلان کیا کہ مائیکروسافٹ اگلے چار برسوں میں بھارت میں 17.5 بلین ڈالرسے زیادہ کی سرمایہ کاری کرے گا۔
ستیہ نڈیلا نے مائیکروسافٹ کی اس بڑی سرمایہ کاری کے چار بنیادی مقاصد بتائے، نمبرایک اے آئی اور کلاؤڈ کے لیے ایک بڑا ڈیٹا سینٹر نیٹ ورک تیار کرنا،نمبر دولوگوں کو اے آئی اور کمپیوٹنگ کی مہارتوں میں تربیت دینا
نمبر تین بھارت کے لیے ملک میں تیار ہائپر اسکیل انفراسٹرکچر بنانا اور نمبر چار نئے کلاؤڈ ریجنز اور کمپیوٹنگ کی جدید سہولیات کی تعمیر۔
مائیکروسافٹ نے کہا کہ وہ بنیادی طور پر حیدرآباد میں بھارت کے جنوبی وسطی کلاؤڈ ریجن پر توجہ مرکوز کر رہا ہے۔ یہ کلاؤڈ ریجن سنہ 2026 کے وسط تک لائیو ہو جائے گا۔ کمپنی نے یہ بھی کہا کہ ایک نیا کلاؤڈ ریجن تیار کیا جا رہا ہے جو کولکاتا کے ایڈن گارڈنز اسٹیڈیم سے تقریباً دوگنا بڑا ہو گا۔
دوسری طرف ای کامرس کمپنی امیزون نے اعلان کیا کہ وہ بھارت میں 2030 تک اپنے کاروباروں میں $35 بلین (3.14 لاکھ کروڑ روپے سے زیادہ) کی میگا سرمایہ کاری کرنے کا منصوبہ بنا رہا ہے۔تازہ میگا سرمایہ کاری اے آئی سے چلنے والی ڈیجیٹائزیشن، برآمدات میں اضافے اور ملازمتوں کی تخلیق پر مرکوز ہوگی۔
امیزون سمبھاو سمٹ کے دوران یہ اعلان کرتے ہوئے سینئر وی پی ایمرجنگ مارکیٹس، امیت اگروال نے کہا کہ کمپنی نے بھارت سے برآمدات کو تقریباً 20 بلین امریکی ڈالر سے چار گنا بڑھا کر 80 بلین امریکی ڈالر تک پہنچانے کا ہدف مقرر کیا ہے اور سنہ 2030 تک ایک ملین اضافی براہ راست، بالواسطہ اور موسمی ملازمتیں پیدا کرے گا۔
"ایمیزون نے 2010 سے اب تک بھارت میں 40 بلین ڈالر کی سرمایہ کاری کی ہے۔ اب ہم بھارت میں اپنے تمام کاروباروں میں 2030 تک مزید 35 بلین ڈالر کی سرمایہ کاری کریں گے۔” اگروال نے کہا۔
ایمیزون کا سرمایہ کاری کا یہ منصوبہ مائیکرو سافٹ کے 17.5 بلین امریکی ڈالر کے سرمایہ کاری کے منصوبے سے دو گنا اور 2030 تک گوگل کے 15 بلین امریکی ڈالر کے سرمایہ کاری کے منصوبے سے 2.3 گنا زیادہ ہے۔ اگروال نے کہا کہ امیزون نے اب تک بھارت میں 40 بلین ڈالر کی سرمایہ کاری کی ہے اور وہ بھارت میں سب سے بڑی غیر ملکی سرمایہ کار ہے۔